Лідар Паўночнай Карэі Кім Чэн Ын у навагоднім тэлезвароце да народа ўпершыню пракаментаваў пакаранне свайго дзядзькі Чан Сон Тхэка, назваўшы яго «ачышчэннем партыі ад бруду».
Па словах кіраўніка КНДР, гэты «рашучы крок» умацаваў адзінства краіны.
«Своечасовае і дакладнае рашэнне нашай партыі аб ліквідацыі антыпартыйных, антырэвалюцыйных элементаў дапамагло нам сцэментаваць салідарнасць унутры партыі», — сказаў Кім Чэн Ын.
13 снежня Цэнтральнае тэлеграфнае агенцтва Карэі (ЦТАК) паведаміла пра пакаранне смерцю Чан Сон Тхэка, абвінавачанага ў спробе ажыццяўлення дзяржаўнага перавароту. Супраць яго былі таксама вылучаныя абвінавачванні ў карупцыі, распусных паводзінах, контррэвалюцыйнай дзейнасці і ўжыванні наркотыкаў.
Да гэтага 67-гадовы Чан Сон Тхэк быў бліжэйшым паплечнікам свайго пляменніка і лічыўся адной з самых магутных фігур у КНДР.