Дэпутатка Алена Анісім заявіла, што аператары кабельнага тэлебачання маюць ідэю стварыць канал з беларускамоўным кантэнтам — мастацкія і дакументальныя фільмы і мультфільмы, навукова-папулярныя перадачы і іншае, як арыгінальна беларускае, так і ў перакладзе.

«Наша Ніва» знайшла прынамсі аднаго зацікаўленага чалавека — дырэктара канала «Светлае ТБ» Сяргея Білецкага.

Ён кажа, што Анісім магла штосьці не так зразумець, бо канкрэтна ягоны інтарэс — гэта не асобны канал, а напаўненне ўжо існага беларускім кантэнтам.

«Светлае ТБ» ужо цяпер транслююць кабельныя аператары. Білецкі не бярэцца ацэньваць сваю долю рынка, але кажа, што канал досыць папулярны ў параўнанні з канкурэнтамі: ён беларускі, прыватны.

Навошта Білецкаму гэта трэба?

«Я буду гаварыць па-руску, адразу кажу, бо беларускай мовай не валодаю так, каб гаварыць самому. Я вырас у СССР. А наш зварот да беларускамоўнага кантэнту звязаны з тым, што нашая пазіцыя такая: беларускае тэлебачанне мае мець беларускамоўную ідэнтыфікацыю. У які момант прыйшло ўсведамленне, я не ведаю. У нашых планах у сетцы вяшчання размяшчаць пакуль 20% беларускамоўнага кантэнту, які будзе апрацоўвацца рускімі субтытрамі, каб рускамоўны глядач мог успрымаць нашую спадчыну таксама. І гэта не супрацьпастаўленне рускай мове, гэта развіццё», — сказаў ён нам.

Фота з сайта «Светлае ТБ»

Фота з сайта «Светлае ТБ»

Але дырэктар дадае, што пакуль канкрэтных прапаноў ім не паступала — толькі прапановы супрацоўніцтва.

«А каб хтосьці прыйшоў і сказаў «вось, разгледзьце наш матэрыял для публікацыі», такога не было. Мы ж шукаем аўтарскія музычныя творы, напрыклад, было б вельмі цікава ўбачыць праграму пра людзей, якія зрабілі ўнёсак у развіццё і станаўленне нашай краіны: пра ўчора, пра сёння. На публіцыстыку ў нас няма ліцэнзіі, мы культурна-асветніцкі канал», — сказаў Сяргей Білецкі.

Ці будзе на канале самацэнзура?

«Хто б да нас ні звярнуўся, ёсць рэдкалегія па ўсіх пытаннях: ад зместу да гуку. Прадукт будзе падвергнуты самацэнзуры — нашаму бачанню тэлевізійнага працэса».

Пра памер аўтарскіх ганарараў на «Светлым» пакуль не кажуць: маўляў, у кожным выпадку будуць ацэньваць індывідуальна і чакаюць прапаноў.

Клас
0
Панылы сорам
0
Ха-ха
0
Ого
0
Сумна
0
Абуральна
0

Хочаш падзяліцца важнай інфармацыяй ананімна і канфідэнцыйна?