Традыцыйна найбольш папулярным кірункам у беларускіх шопінг-турыстаў з'яўляецца Польшча. Да таго ж, у адрозненні ад той жа Літвы, гэтая краіна цалкам адмяніла кавідныя абмежаванні пры перасячэнні мяжы, ды і мінімальная сума для вяртання ПДВ тут ніжэйшая. Акрамя таго, з 1 лютага гэтага года ў Польшчы абнулілі ПДВ на прадукты харчавання.
Тым не менш, задумваючыся пра шопінг у суседняй краіне, не варта забываць і аб транспартных выдатках.
Калі вы паедзеце на аўто, то да выдаткаў на паліва неабходна дадаць кошт страхоўкі, мінімальная сума — 30 еўра (столькі каштуе поліс на 15 дзён). Таксама не варта забываць пра мясцовы збор за перасячэнне мяжы — гэта плюс адна базавая (32 рублі).
Білет на аўтобус ці маршрутку з Мінска да Беластока каштуе 75 рублёў, з Гродна — 60. Шоп-туры трошкі даражэйшыя — 100 рублёў з Мінска і 80 з Гродна.
У Польшчы выгадней за ўсё купляць бытавую хімію, каву, адзенне, абутак, бытавую тэхніку і некаторыя аўтатавары.
Напрыклад, пачак кавы Dallmayr Prodomo вагой 500 г у анлайн-гіпермаркеце «Е-дастаўка» каштуе 34 рублі 99 капеек. У Польшчы такая ж кава прадаецца па 23—27 злотых (13,4 — 16,5 рубля) за 500 г. У цэлым у Літве кава крыху даражэйшая, чым у Польшчы, але тут часта ладзяць акцыі. Падчас адной з іх такі пачак можна было набыць за 3.79 еўра (менш за 11 рублёў).
Каля 10 рублёў можна сэканоміць на маленькай бутэльцы вадкага сродку для мыцця бялізны Persil. З павелічэннем аб'ёму зэканомленая сума павялічваецца.
Падгузнікі — яшчэ адзін папулярны тавар, які набываюць у Польшчы. Напрыклад, пачак падгузнікаў Pampers пятага памеру на 152 штукі ў Беларусі каштуе 149 рублёў. У Польшчы такі ж — 92 рублі. Пры набыцці двух можна аформіць вяртанне ПДВ. Тады кошт зніжаецца да 75 рублёў за пачак. У Беластоку каву, слодычы, падгузнікі і бытавую хімію выгадна купляць на рынку «Фасты». Для зручнасці ў большасці крам прадаўцы адразу выстаўляюць цану брута/нета.
Калі сума ў чэку перавышае 200 злотых (каля 120 рублёў), то ў многіх крамах можна аформіць Tax Free. Каб вярнуць ПДВ (12—18,5% ад сумы пакупкі), вам неабходна вывезці тавар за межы ЕС, адзначыўшыся на мытні пры вяртанні ў Беларусь. Мінімальная сумма для афармлення Tax Free у Літве складае 55 еўра (каля 150 рублёў)
Найбольш адчувальная эканомія выходзіць на дарагіх таварах. Фірмовае адзенне і тэхніка ў Польшчы каштуе крыху танней, чым у Беларусі, а пасля вяртання ПДВ розніца ў цане можа дасягаць нават 30—40%.
Напрыклад, Iphone 11 на 64 GB у Беларусі прадаюць па цэнах ад 1650 рублёў (каля 590 еўра). У Польшчы такі ж смартфон каштуе ў раёне 2500 злотых (каля 530 еўра). З улікам вяртання ПДВ, цана зніжаецца да 430 еўра. У Літве на бягучы момант 11-ы Iphone можна знайсці па акцыйнай цане ў 499 еўра. Пасля вяртання ПДВ яго кошт складзе каля 430 еўра. На адным тэлефоне можна адбіць дарогу і яшчэ выйграць.
Адпаведна, чым вышэйшая цана тавару, тым больш адчувальнай будзе розніца ў патрачаных грошах.
Таксама, пры ўмове вяртання ПДВ, можна сэканоміць каля 20-25% на куплі ноўтбукаў.
Адзначым, што менавіта дзякуючы часоваму павышэнню лімітаў у беларусаў з'явілася магчымасць увозіць дарагую тэхніку без выплаты пошліны. Ліміт быў павышаны з 500 да 1000 еўра.
Таксама можна нядрэнна сэканоміць на куплі аўтамабільных тавараў. Напрыклад, маторнае масла Shell HX 7 10w40 аб'ёмам 4 літры ў Беларусі прадаецца па цане ад 105 рублёў. У Польшчы яго цана складае 100 злотых (каля 60 рублёў).
У Літве маторнае масла таксама таннейшае, чым у Беларусі. Чатыры літры Shell HX 8 5w40 у звычайным супермаркеце каштуюць 40 еўра (каля 112 рублёў). У Беларусі — 160 рублёў.
Сэканоміць немалую суму можна і на шынах. Асабліва, калі гаворка ідзе пра легкавое аўто. З пазадарожнікамі і мікраўтобусамі складаней, бо пара пакрышак для такога роду транспарту можа лёгка «пераважыць» запаветны 31 кілаграм.
Шыны выгадна перавозіць менавіта ў якасці багажу, у адваротным выпадку эканомія будзе меншай. Бо калі пакрышкі паставіць на аўтамабіль, то вы згубіце магчымасць вярнуць ПДВ. Апроч гэтага, вам давядзецца выкінуць старыя пакрышкі, паколькі ў Беларусь забаронены ўвоз былых ва ўжыванні шын.
Напрыклад, цэны на пакрышкі Hankook Kinergy Eco 2, 205/55 R16 у Беларусі і Польшчы амаль аднолькавыя: 201 рубель у Беларусі супраць 190 рублёў у Польшчы. Таму канкрэтна на гэтай мадэлі эканомія стане заўважнай толькі пасля вяртання ПДВ (155 рублёў).
Значна большая розніца ў цане назіраецца на прыкладзе пакрышак Michelin Primacy 4+, 205/55 R16 91 V. Цана ў Беларусі — 327 рублёў, у Польшчы — 240 рублёў, а пры ўмове вяртання ПДВ яна зменшыцца да 205 рублёў.
Важна! Увозіць пакрышкі без аплаты пошліны мае права толькі ўласнік транспартнага сродку.
Таксама ў Польшчы і Літве выгадна купляць брэндавае адзенне і абутак. Напрыклад, большасць мадэляў красовак New Balance у Літве каштуюць 55—75 еўра (150-210 руб).
Акрамя таго, у гэтых краінах па ранейшаму працуюць крамы H&M, Jysk і іншыя. Найбліжэйшыя для беларусаў гіпермаркеты IKEA знаходзяцца ў Вільні і Варшаве. У Беластоку маецца толькі пункт выдачы.
Што да прадуктаў, то тут па-рознаму. Штосьці таннейшае ў Беларусі (грэчка, малочныя прадукты, алей), штосьці — у Польшчы і Літве (мяса, садавіна, гародніна).
Таксама ў Еўрасаюзе значна даражэйшыя паліва і цыгарэты. Там няма даступнага алкаголю, але ў той жа час, цэны на элітны алкаголь там ніжэйшыя.
У Польшчы прадукты ў цэлым крыху таннейшыя, чым у Літве. Асабліва гэта стала прыкметна пасля таго, як польскі ўрад прыняў рашэнне часова абнуліць ПДВ на харчы.
Чытайце таксама:
Улады прыдумалі, як яшчэ дадаткова зарабіць на мяжы
«Без асаблівай рызыкі можна атрымаць каля 100 даляраў». Колькі цяпер зарабляюць на перавозцы паліва і цыгарэт у Польшчу і Літву
