Адзін са славацкіх МіГ-29. Фота: Міністэрства абароны Славакіі
Міністр абароны Польшчы Марыюш Блашчак сказаў, што польскія самалёты F-16 могуць забяспечыць абарону Славакіі з базаў на тэрыторыі Польшчы. Палякі, дарэчы, ужо дапамагаюць абараняць краіны Балтыі ў рамках аперацыі НАТА па патруляванні паветранай прасторы.
Мае вялікае значэнне час гэтай заявы — пасля сустрэчы двух міністраў у Браціславе. Пра гэта наўпрост не гаварылася, але мяркуецца, што крокі па адпраўцы прынамсі некаторых славацкіх МіГаў ва Украіну разглядаюцца вельмі сур'ёзна.
У Славакіі ў агульным ліку ёсць дванаццаць МіГ-29, якія базуюцца на авіябазе Сліяч. Праўда, не зусім зразумела, якая цяперашняя боегатоўнасць гэтых знішчальнікаў, якія на Захадзе лічацца састарэлымі.
