Фота з сацсетак
Сёння тэлеграм-каналы, звязаныя з ГУБАЗіКам, паведамілі пра затрыманне 21-гадовага студэнта Аляксандра Буйліцкага. Ён навучаўся на 4 курсе спецыяльнасці «Бізнэс-адміністраванне» Інстытута бізнэсу Беларускага дзяржаўнага ўніверсітэта.
Вядома, што хлопец вучыўся вельмі добра. На ЦТ ён набраў 353 балы, не займаючыся з рэпетытарамі (хадзіў толькі на курсы матэматыкі). Таксама ён свядома абраў спецыяльнасць, рыхтуючыся паступаць больш, чым за год.
Аляксандр вёў беларускамоўны Твітар пад нікнэймам @BuyLitSky. Усе іншыя ягоныя старонкі ў сацсетках таксама вяліся на беларускай мове.
На сайце БДУ хлопец сярод актывістаў студсаюза Інстытута бізнэсу. Паведамляецца, што ён «арганізатар клуба інтэлектуальных гульняў Ліга Бізнэсу».
Згодна з інфармацыяй ад сілавікоў, яго вылічылі праз арышт адміністратараў аднаго з чатаў. Яму інкрымінуюць два крымінальныя артыкулы, але не паведамляюць, якіх менавіта.
