Рушдзі падвергнуўся нападу, калі збіраўся прачытаць лекцыю ў Інстытуце Чаўтакуа ў Нью-Ёрку. Па словах відавочцаў, на сцэну выбег мужчына з нажом і пачаў «біць або калоць» пісьменніка. Нападнік затрыманы.
Паліцыя штата Нью-Ёрк паведаміла, што Рушдзі атрымаў нажавое раненне ў шыю і быў дастаўлены на верталёце ў бальніцу, яго стан пакуль невядомы.
Салман Рушдзі — брытанскі пісьменнік індыйскага паходжання. Ягоны раман «Сатанінскія вершы», які выйшаў у 1988 годзе, выклікаў пратэст у мусульманскім свеце, бо адзін з персанажаў спісаны з прарока Мухамеда.
Тагачасны іранскі аятала Хамейні публічна пракляў Рушдзі ў сваёй фетве і прысудзіў яго да смяротнага пакарання. За забойства пісьменніка была прызначаная ўзнагарода ў 3 млн даляраў. Гэтая заява прывяла да разрыву дыпламатычных адносін паміж Вялікабрытаніяй і Іранам.
Рушдзі — лаўрэат Букераўскай прэміі за раман «Дзеці паўночы». У 2007 годзе каралева Вялікабрытаніі Лізавета II прысвоіла яму рыцарскі тытул за заслугі перад літаратурай.
