Чытачы перадалі «Медыязоне» відэа з камеры назірання, якая зафіксавала вулічны канфлікт у Слоніме, пасля якога, як сцвярджаецца, загінуў мясцовы жыхар Ілля Машынскі. Звязаўшыся з рэдакцыяй, знаёмы Машынскага кажа, што смяротны ўдар яму нанёс супрацоўнік ДАІ.
Па словах суразмоўцы «Медыязоны»,
вечарам 27 жніўня 37-гадовы Машынскі падышоў да траіх мужчын на стаянцы каля крамы «Алмі» на праспекце Незалежнасці. Адзін з мужчын, якога знаёмы Машынскага называе супрацоўнікам ДАІ, ударыў яго. Пацярпелы ўпаў, пасля чаго трое апанентаў зацягнулі яго ў машыну.
Як вынікае з тайм-кода на відэа з камеры, у 23:15 машына з удзельнікамі канфлікту з'ехала са стаянкі.
Са слоў суразмоўцы «Медыязоны», Машынскі быў знаёмы з чалавекам, які ўдарыў яго. Ён дадаў, што ў Следчым камітэце распачалі крымінальную справу па факце забойства, але пакуль не апытваюць магчымых сведак.
«Медыязона» звярнулася па каментарый ва ўпраўленне СК Гродзенскай вобласці, прадстаўніца УСК запісала пытанне і папрасіла ператэлефанаваць, але пазней перастала падымаць слухаўку.
Пра тое, што ў Слоніме каля крамы «Алмі» на праспекце Незалежнасці загінуў мясцовы жыхар па імені Ілля, паведаміла напярэдадні «Беларускае Радыё Рацыя».
