Фота: vecteezy.com
Усё больш людзей лічаць, што практыка зграбаць і прыбіраць сухое лісце прыносіць больш шкоды, чым карысці, і ёй няма ніякіх апраўданняў. Аднак ёсць выпадкі, калі лісце пакідаць нельга.
Перш за ўсё, лісце ўгнойвае глебу. Яно дапамагае стварыць вялікі слой гумусу, якім пазней могуць скарыстацца іншыя расліны. Акрамя таго, лісце дапамагае даўжэй утрымліваць вільгаць у глебе і абараняе глебу ад холаду. Гэта падобна да падшыванай коўдры, пад якой будзе цёпла ўзімку і раслінам, і дробным жывёлам.
Калі ў садзе застанецца лісце, сябе здолеюць пракарміць карысныя беспазваночныя, што дапамагаюць падтрымліваць глебу ў добрым стане і разрыхляюць яе. Акрамя таго, у такім лісці жывуць вожыкі, якія яшчэ і нясуць адказнасць за паяданне смаўжоў, што шкодзяць ворным культурам. Калі прыбраць лісце з сада, гэта парушыць жыццёвы цыкл вожыка.
Вось чаму слой асенняга лісця важны для экасістэмы — як для жывёл і беспазваночных, так і для раслін, якія вы пазней высадзіце на яго месцы.
Дзе лісце карыснае, а адкуль яго трэба прыбраць
Лепш за ўсё пакідаць лісце на клумбах, лугах з кветкамі і градках з гароднінай. Што датычыцца газонаў, адтуль варта прыбраць лісце, бо траве яно нашкодзіць. Тоўсты слой лісця можа абмежаваць колькасць вады і паветра, што трапляе да газону, а траве яны патрэбныя на працягу ўсёй зімы, і ў гэтым выпадку газон можа пачаць гніць. Акрамя гэтага, вясной, калі вы будзеце прыбіраць лісце, газон можа заразіцца снежнай цвіллю ці іншай грыбковай хваробай.
Таксама не пакідайце лісце ў сажалках і іншых вадаёмах, бо яно гніе ў вадзе, забруджвае яе і можа быць небяспечным для рыбы. Калі ў вадаёме ёсць лісце, гэта можа паскорыць рост зялёных водарасцяў і глею. Прыбірайце лісце і з вечназялёных раслін: большасці з іх трэба доступ да сонечнага святла на працягу даволі доўгага часу, каб мець магчымасць фотасінтэзу, без яго расліны загінуць. Калі жадаеце абараніць расліну ад холаду, хаця б пакідайце на паветры вечназялёныя надземныя часткі раслін.
Нарэшце, прыбірайце лісце, калі яно мае прыкметы хваробы ці інфекцыі. Калі хварэе дрэва, яго лісце можа пераносіць інфекцыю, якая такім чынам перакінецца на іншыя расліны ў садзе. Гэта датычыцца ўсіх дрэў, але асабліва асцярожнымі трэба быць з пладовымі пародамі. Таму калі вы бачыце, што лісце мае карычневы колер ці непрыгожыя плямы на ім, трэба яго як мага хутчэй прыбраць, а лепей спаліць. Не рабіце з іх кампоснае ўгнаенне, бо гэта таксама можа спрыяць распаўсюду інфекцыі.
Можна стварыць з лісця насыпы вакол ствалоў дрэваў і кустоў. Гэта натуральны спосаб эфектыўна абараніць расліну ад холаду, а таксама магчымасць стварыць месца зімоўкі для вожыкаў з саду. Але вясной лісце трэба будзе прыбраць — напрыклад, перанесці яго ў кампост.
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Яркае лісце, грыбы і апошнія прамяні сонца: якой беларусы пабачылі восень
Хочаце вырасціць дома расліну, але вы далёкія ад гэтага? Вам дапамогуць сукуленты
Не выкідайце костку ад авакада — вось 6 варыянтаў таго, як яе выкарыстаць у ежу ці для касметыкі
