Фота: сацсеткі «Віталюра»

Фота: сацсеткі «Віталюра»

У панядзелак, 26 снежня, уласнік «Віталюра» Аляксандр Яцук збіраў пастаўшчыкоў кампаніі на сустрэчу, каб пераканаць іх аднавіць пастаўкі — многія адмовіліся працягваць пастаўкі на фоне негатыўных навін аб кампаніі. 

У кампаній-пастаўшчыкоў на фоне негатыўных навін аб кампаніі ўзніклі сумневы ў мэтазгоднасці супрацоўніцтва. 

Чытайце: «Віталюр» можа ў хуткім часе збанкрутаваць. Некаторыя з рэтэйлу толькі і чакаюць

Доўг кампаніі перад пастаўшчыкамі кожны месяц расце, што адлюстравана ў даных аб прымусовых судовых вытворчасцях. 

У той жа час існыя пастаўшчыкі, якія не маюць прэтэнзій да «Віталюра», атрымліваюць аплаты за пастаўкі праз выканаўчы подпіс натарыуса [згодна з указам № 366 ад 11 жніўня 2011, натарыусы могуць рабіць выканаўчыя надпісы аб спагнанні запазычанасці на патрабаванне юрыдычных асоб. Калі іншы бок прызнае наяўнасць запазычанасці і яе справядлівасць, то грошы спісваюцца з рахунку], у абыход чаргі іншых крэдытораў, якія б'юцца за даўгі ў судах. 

На фоне шматлікіх пытанняў да кампаніі і адмовы супрацоўнічаць «Віталюр» правёў сустрэчу з пастаўшчыкамі. На ёй прысутнічаў таксама гендырэктар «Санта Рэтэйл» Аляксандр Чуйко. 

Асвятлялі яе журналісты лукашэнкаўскіх сродкаў прапаганды.

«Паміж «Віталюрам» і «Санта Рэтэйл» дасягнута пагадненне па заключэнні ўгоды, якая прадугледжвае перадачу ў арэнду ўсіх гандлёвых аб'ектаў сеткі «Віталюр». Мэтай і ўмовай угоды з'яўляецца поўнае пагашэнне дэбіторскай запазычанасці перад пастаўшчыкамі. На сёння мы маем высокі ўзровень падрыхтаванасці. Узгоднены ключавыя параметры, у тым ліку аб'ём плошчаў, якія здаюцца ў арэнду. Гэта 84 гандлёвыя аб'екты. У рамках бягучай угоды юрасобы аб'ектаў нерухомай маёмасці, якія перадаюцца ў арэнду, застануцца ранейшымі. Не разглядаюцца ніякія пытанні, звязаныя з ліквідацыяй або банкруцтвам», — цытуе гендырэктара «Віталюра» Аляксандра Калеснікава адна з лукашэнкаўскіх газет. 

Прастаўнік «Санты» на сустрэчы быў, можна меркаваць, свайго роду гарантам слоў прадстаўнікоў «Віталюра» для прысутных. 

«У любым выпадку для пакрыцця доўгу ў рамках угоды прадугледжаны продаж абсталявання ўнутры гандлёвых аб'ектаў, гэта прыкладна дзве траціны агульнага доўгу кампаніі, адбудзецца таксама продаж рэшты тавару», — таксама было сказана віталюраўцамі. 

Такім чынам, са слоў дырэктара «Віталюра» выцякае, што, фактычна, кампанія з рэтэйлера пераўтвараецца ў ранцье і перадае бізнэс «Санта Рэтэйл». 

«Будзем спрабаваць працягваць зарабляць на опце, адмаўляцца ад розніцы. А таксама на арэндзе. Гэта добры сцэнар. Ёсць таксама перапрацоўка рыбы. З розніцай не атрымалася, праблем шмат», — прызнаў суразмоўца «Нашай Нівы» з ліку работнікаў кампаніі. 

Але фармулёўкі кіраўніцтва «Віталюра» гавораць пра тое, што дамова з «Сантай» яшчэ не падпісаная. Па нашай інфармацыі, Аляксандр Яцук шукае і іншыя варыянты выратаваць кампанію.

Так, як стала вядома «Нашай Ніве», адзін з варыянтаў — прадаць будынкі, каб разлічыцца з даўгамі, але захаваць у іх рознічныя крамы «Віталюр». Атрымліваецца, крама будзе працягваць працаваць там жа, але ўжо ў чужым будынку і за арэнду. 

Па такой мадэлі ў Яцука ўжо працуе некалькі крамаў, але тыя канкурэнты з ліку сетак, якія маглі б выкупіць памяшканні «Віталюра», на такую мадэль у большых масштабах не згодныя. 

У любым разе, лёс кампаніі вырашыцца ў хуткім часе. Калі яна сапраўды аддасць памяшканні «Санце», то ў буйнога «Еўраопта» з'явіцца вялікі канкурэнт. 

Прадстаўнікі бізнэс-колаў падкрэсліваюць, што Аляксандр Яцук мае рэпутацыю чалавека, «які зрабіў сябе сам», але «дарма вырашыў, што калі ён добры ў опце, то сто працэнтаў будзе добры і ў розніцы». 

Асноўная праблема 27-гадовай кампаніі ў тым, што «Віталюр» узяў празмерна амбітны стратэгічны курс на адмову ад арэнды памяшканняў для сваіх крамаў і пабудовы ўласных плошчаў.

«Віталюр» разгарнуў вялізнае будаўніцтва, але здарыўся 2020-ты і 2022-і: рэпрэсіі, напад на Украіну і санкцыі ў адказ. У выніку банкі скарацілі фінансаванне будоўляў. 

Для працягу будаўніцтва «Віталюр» пачаў карыстацца схемай свайго роду кароткага самакрэдытавання, затрымліваючы плацяжы пастаўшчыкам. Зрабіць усё «прыгожа» не атрымалася, і праблемы сталі нарастаць камяком. 

Дайшло да неплацяжоў: да прыкладу, у лістападзе 2022-га пастаўшчыкі падалі заявы на спагнанне з «Віталюра» праз суд 4,8 млн рублёў, у снежні (па стане на 15.12) — 1,5 млн рублёў. 

Дакладнай справаздачнасці «Віталюра» за 2022-гі ў доступе яшчэ няма, але і 2020-ты, і 2021 год сетка спрацоўвала ў мінус — 19,7 і 14,9 млн рублёў адпаведна. 

Ад абазнаных суразмоўцаў «Нашай Ніве» стала вядома, што ў структуры доўгу кампаніі цяпер пераважаюць кароткія даўгі — блізка да 90%. Прыкладна такі ж працэнт быў і ў 2021-м (на суму 376 млн рублёў). 

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?