Блогер «Трынаццаты» належыць да супольнасці блогераў-шавіністаў, ускормленых Крамлём. Фота з яго тг-канала
Найбольш эмацыйна выказаўся блогер «Трынаццаты», які напісаў, даведаўшыся пра перамір'е, два кароткія пасты, якія складана нават цытаваць, бо большасць слоў — нецэнзурныя. Частка аднаго паста вынесеная ў загаловак.
Блогер «Трынаццаты» належыць да супольнасці блогераў-шавіністаў, ускормленых Крамлём, які не шкадаваў грошай на нагнятанне шавіністычных, антыўкраінскіх і антызаходніх настрояў. Назва «блогеры» не павінна падманваць: пад гэтай шыльдай часта хаваюцца высокабюджэтныя структуры са шматлікімі аўтарамі, аператарамі і піяр-менеджарамі.
«Трынаццаты» вылучаецца сярод блогераў тым, што рэальна ваюе — з 2014 года. Гэтую вайну ён прайшоў ад першага дня, займаў радыкальныя пазіцыі, заклікаў забіваць украінскіх палонных, а пасля адступлення з-пад Херсона ў яго пастах нарастаюць істэрычныя ноткі.
«П..ухи..аные, какие перемирия? Какие на..й праздники? Вы мне вернёте моих друзей которых нет из-за ваших преступных приказов? Вы вернёте мне здоровье и психику?» — піша ён у стылістыцы, якую цяжка перакласці.
Іншыя ваенкары трымаюцца больш «парламенцкай» рыторыкі і крытыку спалучаюць з іроніяй, але непрыняцце імі зробленага кроку не робіцца ад гэтага менш рэзкім і адназначным.
Ваенкар Раман Сапанькоў напісаў:
«Перамір'е — зло. Яно аднабаковае, а значыць выконвацца не будзе. Дзякуй Праваслаўнай царкве за геніяльную ідэю. Што б мы без вас рабілі».
Вядомы ваенкар «Рыбарь» лічыць:
«Каляднае перамір'е — гэта, вядома, жэст нібыта прыгожы палітычна. Традыцыйны такі. У рамках агульнага ваенна-палітычнага палітэсу (які ўсім да аднаго месца). Але вось толькі, можа, хопіць кідаць бісер перад свіннямі? Усё адно не ацэняць. З нашага боку, дарэчы, таксама».
Сумняваецца «Рыбарь» нават у прапагандысцкім эфекце такога кроку, разумеючы, што інфармацыйную вайну па-за межамі Расіі пуцінскі ўрад прайграў:
«А рабіць такі жэст, каб дачакацца правакацый з боку Украіны і прылюдна іх у гэтым абвінаваціць, — таксама гісторыя, шчыра кажучы, так сабе. Ну, абвінавацяць. А тыя скажуць, што Крэмль сам сябе абстраляў. І заходнія СМІ растыражуюць».
«Гэта рашэнне — адкрытае вар'яцтва, якое нясе асабліва дэкларатыўны характар. Цяжка ўявіць, каб яно насамрэч выконвалася байцамі, а асабліва ўкраінскай арміяй, якой падобныя фокусы зусім не патрэбныя…
У найлепшым выпадку гэта рашэнне ні да чога рэальна не прывядзе, толькі дасць падставу расшаркацца па навінах, у горшым — праціўнік толькі ўзмоцніць сваё агнявое ўздзеянне на фоне бяздзейнасці нашых войскаў», — пагаджаецца з «Рыбарем» ваенкар «Военный осведомитель».
Паэтка-ваенкарка Ганна Долгарава проста іранізуе:
«Цудоўная ідэя, проста цудоўная. У нас якраз украінцы [у арыгінале — абразлівае слова] даўно на Лісічанск паглядаюць, давайце ім зробім падарунак на Каляды».
І тую ж іранічную хвалю падхоплівае Ігар Гіркін-Стралкоў:
«Вельмі моцны ход! Але трохі незавершаны…
Другім вельмі моцным ходам з боку Вярхоўнага Галоўнакамандуючага было б абвясціць аб тым, што ён адпраўляецца на перадавую ў раёне горада Данецка (напрыклад), каб (ва ўмовах аднабаковага перамір'я) адсвяткаваць з салдатамі Каляды.
Мяркую, што такі ход ацэняць не толькі паважаныя кіеўскія партнёры, але і салдаты ў акопах, якія будуць двое сутак «аднабакова перамірвацца».
У выказваннях расійскіх блогераў усё больш незадаволенасці і нават ярасці ў адносінах да ўладаў, якія распачалі вайну, абяцаючы перамогу і трафеі, але яна прынесла толькі гіганцкія ахвяры і разбурэнні. Гэтая ярасць пачынае распаўсюджвацца і асабіста на Пуціна. «Вы там …анулись..яди..аные кремлевские?» — такіх выразаў, як цяпер ужывае «Трынаццаты», раней шавіністычныя блогеры не дазвалялі.
