Новы маршрут «У пошуках Рагвалода» або «Полацкая Венецыя» набыў неверагодную папулярнасць. Каб прайсці па ім, у Полацк прыязджалі нават жыхары іншых гарадоў.

Фота: «Байдарачнікі Полаччыны»

Фота: «Байдарачнікі Полаччыны»

Узровень вады ў Дзвіне на самым піку падымаўся вышэй за адзнаку 11 метраў. Дзённыя і вячэрнія сплавы па Полацкай Венецыі байдарачнікі праводзілі цэлы тыдзень, любуючыся відамі горада з незвычайных ракурсаў.

На памяць ім засталіся фантастычна прыгожыя фатаграфіі на фоне Сафійскага і Богаяўленскага сабораў, Музея беларускага кнігадрукавання, моста з вячэрняй падсветкай, піша мясцовы рэсурс Gorod214.by.

Незабыўныя ўражанні пакінулі водныя прагулкі па бярозавым гаі і частцы затопленай тэрыторыі парку каля Кургана неўміручасці.

«Шыкоўны, цудоўны, велічны», — не стамляліся захапляцца родным горадам байдарачнікі.

З уражанняў:

«Полацк з вады выдатны! Асабліва ў вячэрні час: адлюстраванне ў вадзе Сафійскага і Богаяўленскага сабораў, мастоў, вуліцы Ніжне-Пакроўская. Узвышаючыся над вадой, турыстычныя аб'екты паўстаюць ва ўсёй сваёй пышнасці. Гэта не перадаць словамі — гэта трэба бачыць! Прырода ў чарговы раз паказала нам свае цуды. Трэба толькі глядзець, запамінаць і дзяліцца з тымі, каго не было з намі».

Але вада ў рацэ пачала спадаць, і з «Венецыяй» давялося развітацца да наступнай вялікай паводкі. Зрэшты, сумаваць аматары актыўнага адпачынку не маюць намеру.

Ужо на панядзелак анансаваны вячэрні сплаў-экскурсія «Полацк — погляд з вады» па самым папулярным маршруце цёплага сезона.

Так што «Бывай, Венецыя!» і «Добры дзень, Полацк!». Для палачан гэта самы найлепшы, самы любімы горад на зямлі, спасцігаць таямніцы якога і па вадзе, і па сушы можна да бясконцасці.

Чытайце таксама:

«Праплывалі паміж дамамі, ішлі над затопленым парніком». Байдарачнікі скарысталі паводку, каб адкрыць «Полацкую Венецыю»

Мінскі блогер паплаваў па падтопленым Віцебску на ружовым фламінга і сабраў паўмільёна праглядаў у сацсетках

У Гомелі ратавальнікі ўратавалі ад вялікай вады коціка ВІДЭА

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?