Па ТБ паказалі чатырох затрыманых.
Адна з іх — 29-гадовая Вікторыя Волчак. Яна родам з Глуска, жыве ў пасёлку Ждановічы Мінскага раёна. Дзяўчына адвучылася ў Нясвіжскім педагагічным каледжы. Працавала ў салонах сувязі, на аўтазапраўцы, у крамах.
Вікторыя Волчак. Скрын відэа АНТ
Другая дзяўчына, якую затрымалі, — Савачкіна Ганна. Мінчанцы 24 гады, вучылася на журфаку БДУ, але не скончыла, у 2022-м паступіла зноў — на першы курс біяфака.
Савачкіна Ганна. Скрын відэа АНТ
Затрымалі і саму Ганну, і яе маці Таццяну Русак.
Затрымалі таксама 29-гадовага Андрэя Грыгор'ева. Хлопец з Мінска, скончыў медыцынскі каледж і працаваў зубным тэхнікам у прыватным стаматалагічным цэнтры.
Андрэй Грыгор'еў. Скрын відэа АНТ
Што іх звязвае?
На АНТ сцвярджаюць, што ўсе знаёмыя з 23-гадовым Валерыем Водзіным, які ў пачатку лютага выехаў ва Украіну і пасля далучыўся да добраахвотнікаў. Хлопец нібыта перасылаў у Беларусь настольныя электрапліты, каб з іх дапамогай учыніць «тэракт на 9 Мая». Забраць і схаваць іх ён прасіў сваіх знаёмых.
Валерый Водзін. Скрын відэа АНТ
Па версіі АНТ, электрычныя пліты даставілі з Кіева ў Мінск (у пункт на Каменнай Горцы) абходным шляхам праз Еўропу. Адну з электрычных пліт, як сцвярджаюць у фільме, забрала Ганна і закапала на могілках у Калодзішчах, куды яе падвезла маці. Другую, паводле версіі АНТ, забрала Вікторыя, а хаваў Андрэй.
Усе чацвёра за кратамі. Вядома, што некаторых затрымалі каля двух тыдняў таму. Па словах прапагандыстаў, яны праходзяць па справе як падазраваныя ў здрадзе дзяржаве (артыкул 356 КК) і здзяйсненні акта тэрарызму (артыкул 289 КК).
У сюжэце начальнік Галоўнага ўпраўлення спецыяльных экспертыз Дзяржаўнага камітэта судовых экспертыз Уладзімір Атрашкоў каментуе, што ў плітах знайшлі пластычныя выбуховыя рэчывы і дэтанатары, а агульная маса выбуховых рэчываў — каля 2 кг.
Ускрытая плітка, паказаная на АНТ
Але сюжэт пакідае недаўменне — што ў ім робяць акцёрскія сцэнкі з удзелам студэнтаў і выкладчыкаў журфака БДУ? На працягу ўсяго роліка паказваюць «мастацкія рэканструкцыі» таго, як нейкі прыяцель у перапісцы просіць студэнта забраць пасылку, той пагаджаецца, а пасля іх збіраюць у зале журфака на прагляд прапагандысцкага фільма АНТ і ён перадумвае.
Пасля такога «мастацкага ходу» застаецца пытанне: наколькі можна верыць астатняй інфармацыі ў сюжэце?
Чытайце таксама:
КДБ Беларусі заявіў пра тое, што ў краіне планавалі тэракты на 9 Мая
