Чыноўнікі ў Бялынічах адзначаюць Дзень сцяга. Самая высокая ў цэнтры — старшыня райвыканкама Вольга Прыстромская. Фота: телеграм-канал «Новости Белыничей»
Галоўныя ўрачыстаці праходзілі ў абласных цэнтрах. На іх, як водзіцца, прадпрыемствы і арганізацыі рэкрутавалі ўдзельнікаў, якія меліся з'явіцца са сцягамі.
У Магілёве да гэтага дня прымеркавалі адкрыццё адрамантаванай вуліцы Камсамольскай. Тралейбусам па ёй праехала кіраўніцтва гарвыканкама і аблвыканкама. Старшыня абласной вертыкалі Анатоль Ісачанка і гарадскі кіраўнік Аляксандр Студнеў былі без гальштукаў.
Анатоль Ісачанка (справа ля акна тралейбуса), побач з ім Аляксандр Студнеў. На пярэднім плане — старшыня гарадскога Савета дэпутатаў Максім Гурын. Усе без гальштукаў. Фота: газета Магілёўскага райвыканкама «Прыдняпроўская ніва»
Рамонт вуліцы выдаўся скандальным, бо дарожнікі знішчылі старую брукаванку на ёй.
Брук, выяўлены падчас работ на Камсамольскай вуліцы. Фота: тэлеграм-канал Aktahon
Ускладаць кветкі да мемарыяла «Барацьбітам за савецкую ўладу» магілёўскія чыноўнікі прыйшлі пры гальштуках. Плошча Славы, дзе адбылася асноўная ўрачыстасць, патанала ў чырвона-зялёным. У першых шэрагах была міліцыя.
Ускладаць кветкі да мемарыяла «Барацьбітам за савецкую ўладу» чыноўнікі прыйшлі пры гальштуках. Фота: тэлеканал «Беларусь 4 Магілёў»
У Шклове Дзень дзяржаўнага сцяга адзначылі без асаблівага пафасу. Да афіцыйнай даты правялі велапрабег. Старшыні райвыканкама Андрэя Камко, як выглядае з публікацый праўладных медыя, на ўрачыстасцях не было.
Сціплая імпрэза на малой радзіме Лукашэнкі. Намеснік старшыні райвыканкама Аляксандр Давыдовіч у завялікім касцюме. Фота: газета Шклоўскага райвыканкама «Ударны фронт»
Букет з трох гваздзікоў да помніка палеглым у Другую сусветную вайну ўскладаў намеснік старшыні Шклоўскага райвыканкама Аляксандр Давыдовіч. На чыноўніку быў завялікі для яго касцюмны гарнітур. Побач з ім была жанчына ў майцы з надпісам «Любимую не отдают».
На ўрачыстасцях у Бялынічах. Фота: телеграм-канал «Новости Белыничей»
Найбольш крэатыўнымі на Магілёўшчыне былі чыноўнікі ў Бялынічах. Для іх пашылі чырвона-зялёныя строі.
Старшыня райвыканкама Вольга Прыстромская (у цэнтры). Фота: телеграм-канал «Новости Белыничей»
У такі была апранута і старшыня райвыканкама Вольга Прыстромская. Яна віншавала ў ім пераможцаў спартовага забегу, прымеркаванага да афіцыйнай даты.
У Горках зладзілі вайсковы парад. Яго ўдзельнікамі былі ахоўнікі мясцовай калоніі і лячэбна-працоўнага прафілакторыя для жанчын.
Урачыстасць у Горках. Старшыня райвыканкама Міхаіл Гулы і ахоўнікі горацкай калоніі №9. Фота: газета «Горацкі веснік»
Старшыня райвыканкама Міхаіл Гулы выступаў на фоне траіх вайскоўцаў.
У Крычаве адзначаць Дзень сцяга сабралі апранутую ў мілітары моладзь.
На ўрачыстасці ў Крычаве моладзь апранулі ў мілітары. Фота: krichevlive.by
Старшыня Крычаўскага райвыканкама Андрэй Седукоў у строгім касцюме разам з падначаленымі раздаваў пасведчанні новым членам БРСМ. Тыя ў адказ прысягалі на вернасць «дзяржаўным сімвалам Беларусі».
Старшыня Крычаўскага райвыканкама Андрэй Седукоў. Фота: krichevlive.by
Сёлета ўпершыню ўлады адзначаюць Дзень сцяга, герба і гімна Рэспублікі Беларусь. Да 12 красавіка 2023 года гэта дата была прысвечана толькі гербу і сцягу.
Адзначаюць гэты дзень у памяць пра рэферэндум 14 мая 1995 года, па выніках якога былі адмененыя нацыянальныя сімвалы Беларусі — бела-чырвона-белы сцяг і герб «Пагоня» — і ўведзеныя сучасныя. Пра гімн на тым рэферэндуме гаворкі не вялося.
Дзень сцяга, герба, а цяпер і гімна адзначаюць штогод у другую нядзелю мая. Сёлета на ім не выступіў Лукашэнка. Ён не з'яўляецца на публіцы ад 9 мая.
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Глядзіце таксама:
У Дзярждуме пацвердзілі інфармацыю аб праблемах са здароўем у Лукашэнкі
Лукашэнка бярэ ўдзел у Парадзе Перамогі на Краснай плошчы ФОТА
яны з голаду пухнуць?