Фота: БелТА
Апрацоўка вынікаў другога цэнтралізаванага экзамену знаходзіцца на паўзе, паведамілі «Спутніку» на гарачай лініі РІКВ.
Другі ЦЭ па прадмеце на выбар школьнікі здавалі 21 мая. Яго вынікі, як першапачаткова заяўлялі ў Рэспубліканскім інстытуце кантролю ведаў, стануць вядомыя ў пачатку чэрвеня. Аднак высветлілася, што апрацоўка балаў знаходзіцца пакуль на паўзе праз скандал з першым ЦЭ.
«Я думаю, гэта [вынікі другога ЦЭ] пакуль не так актуальна, як першы экзамен, пытанне па якім цяпер вырашаецца. У нас знаходзіцца Дзяржкантроль, таму пакуль вынікі на паўзе», — распавялі на гарачай лініі РІКВ.
Ці паспеюць кантрольныя службы завяршыць праверку вынікаў першага экзамену і апублікаваць вынікі другога ЦЭ да ўручэння атэстатаў, у РІКВ пакуль не ведаюць.
Уручэнне атэстатаў 11-класнікам павінна адбыцца на школьных выпускных 10 чэрвеня.
Скандал на ЦЭ: што цяпер вядома?
Нагадаем, абітурыенты і іх бацькі абурыліся атрыманымі вынікамі за першы цэнтралізаваны экзамен па беларускай і рускай мовах і запатрабавалі пераліку балаў ад РІКВ.
Пасля рэакцыі Лукашэнкі, Мінадукацыі стварыла спецыяльную групу, куды ўвайшлі матэматыкі, інфарматыкі і спецыялісты па апрацоўцы вынікаў. Зараз яны займаюцца комплекснай праверкай карэктнасці разлікаў балаў за першы ЦЭ.
У выпадку выяўлення памылак Міністэрствам адукацыі будуць прыняты ўсе неабходныя меры па іх ліквідацыі, запэўніў раней міністр адукацыі Андрэй Іванец.
Чытайце таксама:
Як падлічваюць балы на цэнтралізаваным экзамене і чаму гэта схема выклікала абурэнне
