У прынцыпе, пакасіць газон можа кожны дужы чалавек, але не кожны стане марнаваць на гэта свае сілы. Асноўныя заказчыкі Германа — гэта маладыя забяспечаныя людзі (часта праграмісты), якія жывуць у прыватным сектары і ў якіх няма часу даглядаць за прысядзібнай тэрыторыяй. У асноўным хлопец выконвае такія паслугі, як кладка газона, догляд за ім, касьба травы. 

Каб зарабляць, дастаткова купіць трымер за 700 рублёў

З Германам журналісты сустрэліся раніцай у суботу. Хлопец сказаў, што пасля размовы яго чакаюць чатыры замовы. Цяпер самы разгар сезона (сезон максімальнага даходу).

— Як так атрымалася, што чыгуначнік змяніў сферу?

— Я з дзяцінства марыў стаць машыністам, вывучыўся ў чыгуначным каледжы ў Мінску на Сямашкі. Ужо ў першы год працы зразумеў: не маё. У гэтай сферы шмат начных змен, і хапае людзей, для якіх гэта нармальна. А я пасля ночы ў кабіне ўвесь наступны дзень потым марнаваў на тое, каб прыйсці ў сябе. Потым мяне забралі ў войска. Калі вярнуўся з войска, зноў пайшоў на чыгунку. 

Неяк сядзелі з будаўніком у падсобцы, ён мне сказаў пра важнасць займацца справай, да якой у цябе ляжыць душа. Я ўспомніў, што мне ў войску падабалася касіць газон.

Якраз у вёсцы ў Германа быў трымер — хлопец раз-пораз абкошваў участак каля дома. Стаў шукаць пляцоўкі па пошуку замоўцаў. Размясціў аб'яву на «Onlíner Паслугі» — і замовы пайшлі.

— Каб пачаць зарабляць, дастаткова купіць трымер за 700 рублёў. Сярод маіх калег ёсць тыя, хто косіць толькі трымерам. Я з часам купіў другі трымер і яшчэ газонакасілку, яна абышлася рублёў у 900.

— На сайце ў мяне быў нулявы рэйтынг, ніякіх водгукаў. Таму я ставіў нізкую цану, браўся за любыя замовы. Мне яшчэ канкурэнты пісалі наконт маіх цэн: «Ты што робіш?!» Я ўжо пяты год у гэтай сферы і ўвесь час бачу: знойдзецца той, хто выканае замову на 20% танней, абы паклікалі. А потым пачынае працаваць сарафаннае радыё, кліенты выходзяць на цябе самі.

Памятаю сваю першую замову: Ждановічы, забіты ўчастак. Я патраціў на яго ўвесь дзень і зарабіў капейкі, абы атрымаць водгук.

На другую замову мяне наняў да сябе ў памагатыя садоўнік. Ён мяне шмат чаму навучыў. Ён растлумачыў, што траву пасля касьбы трэба кудысьці вывезці, а ў мяне нават мяхоў для яе не было, і я не думаў, што мне давядзецца нешта вывозіць. Сказалі вывезці — я ж не буду спрачацца, а вырашаю на месцы, што рабіць. Праблемы я заўсёды вырашаў па меры з'яўлення. Сказалі вывезці траву — яшчэ не ведаю як, але я гэта дакладна зраблю. 

— Гэта значыць, вас яшчэ трэба было вучыць, калі вы бралі першыя заказы? 

— Атрымліваецца, што так. Я стараўся недзе нешта пачытаць, паглядзець відэа. Цяпер думаю так: дастаткова паглядзець адзін ролік на YouTube, каб зразумець, як правільна касіць. І далей напрацоўваецца досвед. 

А досвед у Германа ўжо чатырохгадовы, ён умее рабіць ідэальны газон.

— Як зразумець, што газон касіў не прафесіянал, а аматар?

— У аматара пасля касьбы газонакасілкай на газоне застаецца паласа ў выглядзе змейкі. Не ўсе ведаюць, што перыядычна трэба мяняць кірунак руху касілкі, інакш застанецца каляіна. Не ўсе ўмеюць правільна падабраць вышыню пакоса — каб яна не аказалася занізкай, пачаткоўцы часам косяць да прагалін на зямлі. Не ўсе абкошваюць вакол дрэў: вакол іх не павінна застацца высокай травы, яе прыбіраюць трымерам, хоць нават прафесіяналы часам лянуюцца гэта рабіць. 

«З гэтай працай лёгка мець 200 рублёў за дзень»

Яшчэ нядаўна Герман займаўся яшчэ і доглядам за туямі, але апошнім часам бярэцца за паслугі па працы з газонам. 

— Мець справу з газонам нашмат цікавей, таму што ты ствараеш. Газон патрабуе ўвагі, як дзіця, ён не можа вырасці сам па сабе. За ім трэба сачыць, вычэсваць, раўнамерна паліваць. Я бачу, што раблю прыгажосць. Дзеля кладкі газона мне раз-пораз даводзіцца стаяць на каленях, а потым бачу, як у мяне добра атрымалася, і гэта афігеннае пачуццё. 

Прыемна, калі бачыш, як добра вырас газон, які ты пасадзіў: роўненька-роўненька, як ты і хацеў.

Хлопец кажа, што яму практычна нерэальна распаўнець праз вялікую фізічную нагрузку. Распавядае, што сілкуецца хот-догамі на запраўках, часта заказвае шаўрму, і гэта ніяк не адбіваецца на яго вазе.

Давайце пяройдзем да пытання аб даходах. 

— З гэтай працай лёгка мець плюс-мінус 200 рублёў за дзень. Можна касіць шмат і кожны дзень, было б жаданне. Ёсць людзі, якія кажуць, што няма працы, і проста ляжаць. А ёсць тыя, хто кожны дзень будзе ўкалываць. Прыйшло лета — я адпачыў толькі два разы, таму што шмат заказчыкаў. За месяц у мяне выходзіць чыстымі не менш за 3500 рублёў. Гэта ў сезон, ён доўжыцца з мая па кастрычнік. У кастрычніку пачынаецца вычэсванне газона, угнаенне на зіму, кансервацыя паліву. 

За дзень я неяк зарабіў 700 рублёў. Мой самы вялікі даход — 5000 рублёў за месяц, гэта ўжо чыстымі, пасля выплаты падаткаў. Як ІП, я выплачваю 16%.

У цэлым узровень даходаў вельмі добры, асабліва для прафесіі, якая не патрабуе англійскай на ўзроўні C1 і спецыфічных універсітэцкіх ведаў. Але не ўсё так проста. 

Калі вы таксама жадаеце зарабляць падобнай справай, будзьце гатовыя да таго, што гэта пякельная фізічная праца, асабліва ў спякоту.

Звычайны працоўны дзень Германа доўжыцца 12 гадзін, з дзевяці да дзевяці. З такім графікам даводзіцца часта прапускаць сяброўскія вечарынкі. Нельга злоўжываць алкаголем: гэта не праца ў найме, ніхто цябе ўтрымліваць не будзе. Не аплачваецца адпачынак, няма бальнічных. Часам даводзіцца працаваць ва ўмовах бруду, увесь час удыхаць бензін. Бывае, на тэхніку кідаюцца сабакі гаспадароў участка або ў кустах хаваецца ціхая непрыемная змяя.

Рэдка, але бывае, што не атрымліваецца прыйсці да агульнага меркавання з замоўцам.

— Учора мы дамовіліся з кліентам скасіць 14 сотак, я яму назваў сярэдні кошт. Прыязджаю, а там быльнік вышэйшы за мяне, яго трэба касіць нажом і ў два заходы. Гэта ўжо іншы кошт. Чалавек не захацеў даплачваць і адмовіўся ад маіх паслуг, адразу ж напісаў мне негатыўны водгук. 

Яшчэ адзін момант, да якога варта быць гатовым, — гэта сезоннасць, некалькі месяцаў заказаў не будзе. Таму Герман рэкамендуе мець яшчэ нейкую прафесію. Сам ён пачаў паціху адыходзіць у будаўніцтва, заняўся гіпсакардонам. У планах адкрыць вялікую фірму і наймаць супрацоўнікаў.

— Калі нічога не мяняць, то ў цябе будзе прыкладна роўны ўзровень даходаў, не ніжэйшы і не вышэйшы. А я думаю, як зарабіць яшчэ больш.

— Хтосьці скажа: «Няхай ён зарабляе, затое працуе абслуговым персаналам». Вас не бянтэжыць такі статус?

— Я працую сам на сябе, гэта мой хлеб. 

Вось пра што яшчэ трэба ведаць, калі захочаце так зарабляць

Мінулі тыя часы, калі пакасіць участак вам мог сусед за бутэльку. Цяпер прыйшоў час цывілізацыі, таму будзьце гатовыя да таго, што спачатку трэба заключыць дамову з заказчыкам з прапісанымі гарантыямі. Пасля касьбы або іншай паслугі на прысядзібнай тэрыторыі неабходна скласці акт выкананых работ. 

Герман з дапамогай рэкамендацый з інтэрнэту самастойна склаў тэкст дамовы. Кажа, што спачатку было складана разабрацца з паперамі, затое потым усё атрымалася. 

— Дагавор абараняе абодва бакі — вас, як выканаўцу, не кінуць на грошы. А заказчык у выпадку чаго атрымлівае гарантыю. У мяне быў выпадак: я ўкладваў газон, але праз засуху сёлета газонная трава расла павольна, затое вылезла пустазелле — у яго вельмі добрая выжывальнасць. Так атрымалася, хаця праца выкананая згодна з тэхналогіяй. У выніку я яму даў зніжку і па гарантыі бясплатна зрабіў хімпраполку, хоць пустазелле з'явілася не з маёй віны.

Вядома, замоўца жадае мець дамову на руках, калі ён заказвае дарагую паслугу. Герман зараз палічыць, колькі каштуе кладка газона на 10 сотак.

— Для ідэальнага газона спачатку здымаюць урадлівы пласт, таму што ў ім пустазелле. Закладваецца сетка ад кратоў, яна засыпаецца зверху прачышчаным грунтам, які прасеяны ад каранёў і камякоў. Грунт гэты звычайна заказваюць машынай. Затым па грунце праходзіць каток, ён засяваецца — і чакаем усходаў.

Машына зямлі абыдзецца прыкладна ў 400 рублёў. Насенне — 2,5—3 тыс. На 10 сотак толькі матэрыялы будуць каштаваць тысячы 3—4 рублёў у сярэднім. І кошт працы, калі з сеткай ад кратоў — гэта яшчэ плюс ад 7 тыс. да 10 тыс. рублёў у залежнасці ад участка. Агулам заказчык павінен заплаціць 10—13 тыс. рублёў. Хаця абавязкова знойдуцца тыя, хто скажа, што гэта дорага і што ўсё можна зрабіць за капейкі.

Іншае наша пытанне датычылася выбару тэхнікі. Якую браць?

— У нас быў выпадак: адразу некалькі чалавек касілі траву трымерамі заказчыка, гэта была юрыдычная асоба. У выніку праз два тыдні ўсе трымеры зламаліся праз знос. Калі б імі касілі на дачы адзін раз на тыдзень, яны б вытрымалі, але для прафесійных мэт яны не падышлі. Калі выбіраць для дачы, то бярыце бензінавую газонакасілку ці трымер любой фірмы. У мяне няма нейкіх асаблівых рэкамендацый, таму што ў мяне трымеру сем гадоў, і ён ніяк не зламаецца. Магу толькі сказаць, што ў мяне газонакасілка Husqvarna і трымер Makita, абедзве касілкі бензінавыя.

Чытайце таксама:

«Мы маладыя, хочацца пагуляць». Беларусы расказалі, на якія заробкі жывуць і на што іх трацяць

У Беларусі жыве больш за 7 тысяч даляравых мільянераў — банк UBS

Саладуха пахваліўся, што за год зарабляе 100—150 тысяч даляраў

«Гэта яе штодзённая праца». Айцішнік плаціць сваёй жонцы штомесячны заробак

Клас
38
Панылы сорам
5
Ха-ха
3
Ого
9
Сумна
9
Абуральна
5