Усяго падчас марафону на падтрымку палітвязняў было сабрана 545 740 еўра — без уліку крыптавалюты, сума якой складае яшчэ каля 12 тысяч еўра. Усяго было зроблена 14 655 ахвяраванняў ад 11 428 донараў, з іх 220 — ад уладальнікаў крыптакашалькоў.

Прадстаўніца па сацыяльнай палітыцы Кабінета падкрэсліла, што да 80% гэтай сумы прызначаецца для падтрымкі тых, хто цяпер знаходзіцца ў Беларусі.

Ахвяраванні прыходзілі з 86 краін, практычна з усіх кантынентаў. Але арганізатары марафону вырашылі не агучваць поўнага спіса гэтых краін, бо ў шэрагу з іх цяпер пануюць недэмакратычныя рэжымы і спонсары могуць трапіць пад пераслед уладаў у сваіх краінах.

Лідарамі па колькасці ахвяраванняў былі Польшча (6383), Літва (1463), ЗША (1333), Германія (1008). Самыя вялікія грашовыя сумы прыйшлі з Польшчы (200 563 еўра), ЗША (89 740 еўра), Літвы (55 130 еўра), Германіі (39 131 еўра), Вялікабрытаніі (25 790 еўра). І менавіта з Вялікабрытаніі быў дасланы самы вялікі грашовы перавод на суму 10 тысяч еўра.

Сродкі ахвярадаўцаў арганізатары марафону размяркоўваюцца праз некалькі фондаў і ініцыятываў, якія займаюцца дапамогай палітвязням. Такім чынам, Беларускай Радзе культуры на сёння накіравана 9500 еўра; Анархічнаму чорнаму крыжу ў Беларусі — 13 500 еўра; фонду дапамогі беларусам у Літве «Razam» —13 500 еўра; дабрачыннай арганізацыі Littouwin LIONS CLUB — 13 500 еўра; праваабарончай ініцыятыве дапамогі палітзняволеным Dissidentby — 14 000 еўра; дабрачыннаму фонду «Краіна для жыцця» — 18 000 еўра; ініцыятыве BY_help 36 900 еўра, Фонду беларускай салідарнасці BYSOL — 100 000. Агульная сума размеркаваных сродкаў на 5 кастрычніка складае 218 900 еўра.

За размеркаваннем сродкаў сочыць назіральная рада, у склад якой уваходзяць прадстаўніца па сацыяльнай палітыцы Аб'яднанага пераходнага кабінета Вольга Гарбунова і прадстаўнікі 8 незалежных СМІ. 

Ад пачатку планавалася, што ўсе сродкі будуць размеркаваны і выплачаны цягам трох месяцаў, але працэс зацягнуўся, бо, тлумачыць Гарбунова, ён вымагае цэлага шэрагу бюракратычных працэдураў у адпаведнасці з заканадаўствам краін Еўрасаюза.

Вольга Гарбунова мяркуе, што да канца гэтага года размеркаванне сабраных у межах марафону сродкаў будзе завершана.

Прадстаўніца па сацыяльнай палітыцы распавяла, што пасля з'яўлення інфармацыі пра распачатую ГУБАЗіКам крымінальную справу супраць арганізатараў марафону ахвярадаўцы пачалі пытацца, ці не пагражае ім пераслед з боку беларускіх уладаў:

«Падазраванымі ў гэтай справе з’яўляюцца каля 60 чалавек. Мяркуючы з колькасці, гэта журналісты, людзі мастацтва, палітвязні — удзельнікі жывога эфіру. Раней суд Цэнтральнага раёна Мінска прызнаў экстрэмісцкімі матэрыяламі відэакантэнт пад назвай «Нам не ўсё адно».

Што да ахвярадаўцаў, то мы, як арганізатары, гарантуем поўную канфідэнцыйнасць — мы не захоўваем асабістых даных і не планавалі іх апублічваць. Таксама мы ўпэўнены ў абароненасці плацежнай сістэмы Stripe, праз якую праходзілі сродкі. Але мусім папярэдзіць, што сілавыя структуры могуць пайсці на правакацыі, запалохваць людзей, кажучы, нібыта ім «усё вядома».

Што да непасрэдных атрымальнікаў, працягвае Вольга, то тут бяспеку можа гарантаваць толькі прынцып двухбаковай адказнасці — з боку фондаў, якія перадаюць сродкі, і з боку тых, да каго яны трапляюць.

Першы збор сродкаў праз анлайн-марафон Вольга Гарбунова лічыць паспяховым. Яна мяркуе, што мерапрыемства ў такім фармаце можна паўтарыць, улічыўшы досвед працы з вялікімі сумамі ў адпаведнасці з міжнародным заканадаўствам. Але запланаваць такую імпрэзу яна лічыць мэтазгодным ужо пасля таго, калі будзе зразумела, як рухаецца справа, распачатая паводле ч. 2 арт. 361-2 Крымінальнага кодэкса за фінансаванне экстрэмісцкай дзейнасці (санкцыя артыкула прадугледжвае да 8 гадоў пазбаўлення волі).

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?