U Hłybokim adnoviać kryvanohi pomnik Leninu, bo «jon — naša historyja»
14.03.2014 / 15:38
Fota z sajta Westki.info
Pomniki pravadyru suśvietnaha praletaryjatu stajać na płoščach amal usich biełaruskich haradoŭ. Ale Hłybokaje dva hady abychodziłasia biez Lenina.
U 2012-m, kali ŭ horadzie pravodziŭsia Dzień biełaruskaha piśmienstva, pomnik demantavali. Padčas pracaŭ kamienny Iljič raskałoŭsia.
Ciapier ŭ rajonnaj haziecie «Vieśnik Hłyboččyny» ab’iaŭleny zbor srodkaŭ na ŭstanoŭku skulptury «Isus i samarycianka» i rekanstrukcyju pomniku Lenina.
Staršynia miascovaha rajvykankamu Aleh Morchat užo pieraličyŭ na adkryty rachunak miljon rubloŭ.
Halina Unukovič, namieśnik staršyni Hłybockaha rajvykankamu pa sacyjalnym pytańniam, patłumačyła, što pomnik adnaŭlajecca pa prapanovie miascovaj ułady. Inicyjatyvu padtrymali miascovyja kamunisty. Halina Uładzimiraŭna kaža:
«Lenin — heta naša historyja». A ŭłada «zaŭždy padtrymlivaje inicyjatyvy, jakija datyčacca historyi kraju».
«Treba, kab stajała toje, što stvarali našy papiaredniki», — ličyć Halina Unukovič. Sumu hrošaj, jakaja pojdzie na adnaŭleńnie, jana kazać nie stała.
Praŭda, miesca Lenina ŭžo zaniataje. Na płoščy 17 vieraśnia, dzie raniej znachodziŭsia pomnik, ciapier znachodzicca aleja Słavutych ziemlakoŭ. Tam ustalavanyja biusty ŭradžencaŭ Hłyboččyny, u tym liku Jazepa Drazdoviča i Vacłava Łastoŭskaha. Tamu pomnik Leninu zojmie pačesnaje miesca niepadaloku ad Hłybockaha małočna-kansiervavaha zavoda.