Памёр глыбоцкі журналіст Яўген Самсонаў
17.07.2014 / 10:13
Фота westki.info.
Яго не стала ўвечары 16 ліпеня. Сябру Глыбоцкай суполкі ГА «БАЖ» было 58 гадоў.
На Глыбоччыне спадара Яўгена ведалі як сталага карэспандэнта газеты «Вольнае Глыбокае» і сайта «Westki.info».
У 2010 годзе ён стаў пераможцам конкурса імя Веранікі Чаркасавай, заняўшы трэцяе месца з публікацыяй «Як узрывалі глушылку» (часопіс «Абажур» № 3 (78), 2009 г.).
Яўген Самсонаў няспынна вучыўся – быў актыўным наведнікам разнастайных адукацыйных курсаў ГА «БАЖ». Трэнеры ўзгадваюць яго як аднаго з самых старанных навучэнцаў.
Апошнім часам журналіст засвойваў відэажурналістыку і здымаў фільмы пра Глыбокае і яго жыхароў.
У Яўгена Самсонава засталася жонка і двое сыноў. Развітанне са спадаром Яўгенам адбудзецца ў пятніцу, 18 ліпеня, у Глыбокім.