Pravaabaroncy zaklikajuć biełaruskija ŭłady źmianić praceduru vykanańnia śmiarotnaha pryhavoru
10.10.2014 / 18:08
10 kastryčnika — Suśvietny dzień suprać śmiarotnaj kary. U ofisie pravaabarončaha centra «Viasna» ŭ Minsku adbyłasia vynikovaja pres-kanfierencyja kampanii «Pravaabaroncy suprać śmiarotnaj kary ŭ Biełarusi».
Jak zajaviŭ namieśnik kiraŭnika «Viasny» Valancin Stefanovič, z pačatku 2014 hoda ŭ Biełarusi było pryviedziena ŭ vykanańnie dva śmiarotnyja pryhavory i jašče dvoje asudžanych znachodziacca ŭ kamiery śmiarotnikaŭ.
«Z 2010-ha pa hety hod nam viadoma ab pakarańni śmierciu dzieviaci čałaviek, — padkreśliŭ jon. — Asablivuju tryvohu vyklikaje toje, što ŭ piaci vypadkach śmiarotnaja kara była prymieniena niahledziačy na toje, što byli zarehistravany indyvidualnyja zvaroty pryhavoranych u Kamitecie pa pravach čałavieka AAN i ŭ dačynieńni da hetych zvarotaŭ była raspačata pracedura № 92 AAN. Heta značyć, što biełaruskija ŭłady byli infarmavanyja kamitetam ab atrymańni hetych zvarotaŭ i ab tym, što pryhavory nie mohuć być pryviedzieny ŭ vykanańnie da razhladu zvarotaŭ».
Akramia taho, adznačyŭ Stefanovič, Viarchoŭny sud u jakaści apošniaj sudovaj instancyi praciahvaje pryhavorvać da vyšejšaj miery, prysud nabyvaje moc adrazu paśla abviaščeńnia i kasacyjnamu abskardžańniu nie padlahaje. «Što i adbyłosia ŭ spravie Kavalova i Kanavałava, jakija byli pakaranyja na praciahu dvuch miesiacaŭ paśla vyniasieńnia pryhavoru», — padkreśliŭ pravaabaronca.
«My zaklikajem Biełaruś da taho, kab jana źmianiła praceduru vykanańnia śmiarotnaha pryhavoru, jakaja nie raz pryznavałasia Kamitetam pa pravach čałavieka AAN jak žorstkaje i biesčałaviečnaje abychodžańnie, — skazaŭ Stefanovič. — Heta i niavydača cieł pakaranych svajakam, nieŭkazańnie miesca pachavańnia, niepaviedamleńnie rodnym pra čas i miesca pakarańnia».
U rekamiendacyjach, jakija buduć pradstaŭleny pravaabaroncami krainam, jakija ŭvachodziać u Kamitet pa pravach čałavieka AAN, budzie prośba ab tym, kab Biełarusi było rekamiendavana ratyfikavać druhi fakultatyŭny pratakoł da Mižnarodnaha pakta ab hramadzianskich i palityčnych pravach, adznačyŭ Stefanovič. Takim čynam Biełaruś uziała b na siabie abaviazacielstvy pa ŭviadzieńni maratoryja na śmiarotnuju karu i źmianiła zakanadaŭstva.
«Nie moža kraina być členam Savieta Jeŭropy biez maratoryja na śmiarotnuju karu», — dadaŭ pravaabaronca.