Паралімпійскаму чэмпіёну Пісторыусу далі пяць гадоў турмы
21.10.2014 / 11:47
beeld.com beeld.com
Паўднёваафрыканскі суд прысудзіў чэмпіёна Паралімпійскіх гульняў Оскара Пісторыуса, прызнанага вінаватым у ненаўмысным забойстве сваёй сяброўкі Рывы Стынкамп, да пяці гадоў зняволення.
У верасні гэтага года суд прызнаў Пісторыуса вінаватым у ненаўмысным забойстве і адпусціў падсуднага пад заклад да вынясення прысуду.
Рыва Стынкамп была забітая ў лютым 2013 года. Пісторыус казаў, што забіў яе, па памылцы прыняўшы за рабаўніка.
Пракурор прасіў прызначыць паўднёваафрыканскаму лёгкаатлету пакаранне ў выглядзе пазбаўлення волі тэрмінам як мінімум 10 гадоў.
Абарона на працэсе Пісторыуса папрасіла прызначыць для яго пакаранне ў выглядзе грамадскіх работ на тры гады.
Суддзя Таказіле Масіпа сказала, што было вельмі складана вынесці правільны вердыкт, зрабіць так, каб пакаранне было суразмерна зробленаму.
Пісторыусу пагражала да 15 гадоў турмы.