Мінфін занепакоены нізкай эфектыўнасцю працы прамысловых прадпрыемстваў
22.10.2014 / 14:37
Міністэрства фінансаў Беларусі занепакоена вынікамі фінансава-гаспадарчай дзейнасці прамысловых прадпрыемстваў у 2014 годзе.
«Асаблівую занепакоенасць у Міністэрства фінансаў сёлета выклікае нізкая эфектыўнасць працы арганізацый прамысловасці і, як вынік, магчымасць невыканання імі ўмоў аказання дзяржаўнай падтрымкі», — зазначае начальнік галоўнага ўпраўлення фінансаў прамысловага і паліўна-энергетычнага комплексаў Мінфіна Алена Печань у матэрыяле, апублікаваным у кастрычніцкім нумары ведамаснага часопіса Мінфіна «Финансы, учет, аудит».
У якасці прыкладу прыводзіцца сітуацыя, што склалася ў канцэрне «Беллеспаперапрам». За першае паўгоддзе гэтага года з 15 арганізацый канцэрна, якім аказваецца дзяржпадтрымка, 11 атрыманы страты ад рэалізацыі прадукцыі.
«Стратнасць арганізацый значна звужае рэсурсныя магчымасці галіны (гэтай і іншых) па фінансаванні сваіх праектаў, што не дазваляе ім у запланаваных аб'ёмах сфарміраваць інавацыйны і інвестыцыйныя фонды. Больш за тое, няздольнасць такіх прадпрыемстваў своечасова забяспечваць вяртанне бюджэтных пазыкаў, а таксама крэдытаў, узятых пад гарантыі ўрада, цягне за сабой «шлейф» праблем і для бюджэту», — канстатуе Алена Печань.
Па ацэнках Мінфіна, арганізацыі «Беллеспапрапрама» сёння не ў стане самастойна завяршыць рэалізацыю інвестыцыйных праектаў, таму дзяржава аказала прадпрыемствам дзяржпадтрымку і ўнясе ў 2014 годзе ў іх статутныя фонды амаль трыльён рублёў.
Разам з тым Мінфін указвае на нізкую прапрацоўку інвестыцыйных праектаў прадпрыемствамі «Беллеспаперапрама». «Сукупнасць пралікаў вядзе да нізкай аддачы ўкладанняў, якая праяўляецца ў недасягненні запланаваных паказчыкаў праекта (прадукцыйнасці працы, дададзенага кошту, тэрмінаў акупнасці інш.)», — зазначаюць у Мінфіне.
Нагадаем, перад кіраўніцтвам галіны пастаўлена задача мадэрнізаваць дрэваапрацоўчыя прадпрыемствы. У снежні 2012 года Аляксандр Лукашэнка, прызначаючы Аляксандра Пераслаўцава старшынёй канцэрна «Беллесбпаперапрам», патрабаваў дасягнуць вышыняў у выніку мадэрнізацыі дрэваапрацоўчых прадпрыемстваў. «На дрэваапрацоўцы мы навучым і іншых, як трэба працаваць і ставіцца да справы», — зазначаў Лукашэнка.
Праз год, у лістападзе 2013-га, Лукашэнка зняў Пераслаўцава з пасады за неналежнае выкананне даручэнняў па мадэрнізацыі дрэваапрацоўчых прадпрыемстваў. Па ўказе прэзідэнта былы кіраўнік канцэрна быў пераведзены на працу ў будаўнічы трэст № 21, дзейнасцю якога Лукашэнка застаўся незадаволены пасля наведвання «Барысаўдрэва».
Цяперашняе кіраўніцтва «Беллеспаперапрама» ставіць задачу завяршыць мадэрнізацыю дрэваапрацоўчых прадпрыемстваў да канца 2014 года. «Мы павінны даручэнне прэзідэнта выконваць у поўным аб'ёме. Мадэрнізацыя дрэваапрацоўкі знаходзіцца на завяршальнай стадыі. Асноўныя запланаваныя да ўводу сёлета дзевяць прадпрыемстваў будуць уведзены ў эксплуатацыю», — паведаміў журналістам у верасні першы намеснік старшыні канцэрна Дзмітрый Лізура.