Adkryty list Ruchu «Za Svabodu» u «Biełorusskuju vojennuju hazietu» i Ministerstva abarony
23.10.2014 / 18:20
My źviartajemsia da Ministerstva abarony i aficyjnaha vydańnia armiejskaha viedamstva — «Biełaruskaj vajennaj haziety. Va słavu Radzimy» — z prośbaj apublikavać dadzieny adkryty list na jaje staronkach, kab dakazać svaju prychilnaść svabodzie słova i aficerskamu honaru.
Pieršaje. My zaklikajem Vas uziać udzieł u hramadskich słuchańniach, jakija arhanizujucca kampanij «Narodny refierendum».
Adno z pytańniaŭ «Narodnaha refierendumu» niepasredna tyčycca nacyjanalnaj biaśpieki i hučyć tak: «Ci zhodnyja vy, što dla zabieśpiačeńnia niejtralnaha statusu Biełarusi ŭ krainie pavinna być zabaroniena raźmiaščeńnie zamiežnych vajennych abjektaŭ, jadziernaj zbroi, a biełaruskija vajskoŭcy nie pavinny nieści słužbu za miažoj?».
Hetaja prablema vielmi aktualnaja i žyćciova važnaja, uličvajučy palityku uładaŭ Biełarusi, jakaja viadzie da poŭnaj vajenna-palityčnaj zaležnaści krainy ad Rasii i pavieličeńniu pahrozy niehatyŭnaha staŭleńnia biełarusaŭ da militarysckaj prysutnaści aficyjnaj Maskvy na terytoryi krainy. Naturalna, vastryni hetaj temie dadała hieapalityčnaja situacyja apošniaha času ŭ našym rehijonie.
Tak, u miežach vieraśnioŭskaha apytańnia Niezaležnaha instytuta sacyjalna-ekanamičnych i palityčnych daśledavańniaŭ biełarusam zadavałasia pytańnie: «Niadaŭna hałoŭnakamandujučy VPS Rasii V. Bondaraŭ zajaviŭ, što ŭ 2015 hodzie Rasija maje namier raźmiaścić u Biełarusi svaju avijabazu z 24 źniščalnikami SU-27. Adny ludzi pastavilisia da hetaha stanoŭča, inšyja admoŭna, a trecija abyjakava. A jak da hetaha staviciesia Vy?» U 45,1% respandentaŭ staŭleńnie admoŭnaje, u 22,4% — stanoŭčaje. Roźnica — u dva razy!
Padčas słuchańniaŭ varta było b abmierkavać i patryjatyčnaje vychavańnie hramadzian.
Padstavaj dla dyskusii mahli b stać vyniki taho ž apytańnia NISEPD, zhodna ź jakim kožny čaćviorty biełarus hatovy zmahacca sa zbrojaj u rukach u vypadku napadu jak z boku NATO, tak i Rasii. A miž tym, prapahanda ŭ jakaści patencyjnaha voraha maluje vyklučna Paŭnočna-Atłantyčny aljans. Choć apošnija padziei va Ukrainie demanstrujuć, što pahroza niezaležnaści siońnia idzie jakraz z uschodu.
Ruch «Za Svabodu» zaklikaje vajennaje viedamstva da kanstruktyŭnaha dyjałohu, zasnavanaha na svabodzie słova. Hetaja kaštoŭnaść źjaŭlajecca adnoj sa statutnych zadačaŝ našaj arhanizacyi, a taksama pradekłaravana ŭ Kanstytucyi Respubliki Biełaruś.
Hazieta Ministerstva abarony «Biełaruskaja vajennaja hazieta. Va słavu Radzimy» śćviardžaje, što prablem sa svabodaj u Biełarusi niama: «Niedoumienije vyzyvajut užie sami oppozicionnyje łozunhi, prizyvy i vozzvanija. Vziať chotia by nazvanije dvižienija «Za svobodu». Pozvolitielno sprosiť: o čjej svobodie idiet rieč? O svobodie zaklučiennych, čto li? No nie o svobodie žie biełorusskoho naroda, potomu čto vsie znajut: strana naša stała svobodnoj pośle zavieršienija krupnomasštabnoj nastupatielnoj opieracii «Bahration» jeŝie v 1944 hodu».
My prapanujem Ministerstvu abarony i «Vajennaj haziecie» dakazać heta, raźmiaściŭšy na svaich staronkach dadzieny list i zvarot Ruchu «Za Svabodu» da biełaruskaj armii (prykładajecca), a taksama zaklikajem pryniać udzieł u zhadanych hramadskich słuchańniach i aśviatlić ich. My zhodnyja i na luby inšy farmat abmierkavańnia prablem nacyjanalnaj biaśpieki. Naprykład, padčas debataŭ na adnym z telekanałaŭ našaj, jak śćviardžajecca ŭ Vašaj haziecie, svabodnaj i pravavoj dziaržavy.
Druhoje. My patrabujem dać nam słova, u tym liku kab čytačy «Vajennaj haziety» pračytali ab našym adkazie na adkryty paklop vydańnia pra Ruch «Za Svabodu».
«Ratujuŝieje «za svobodu» dvižienije iźviestiło obŝiestviennosť, čto v našiej armii jakoby «niedostatočno raźvit biełorusskij patriotizm, mało diełajetsia dla osoznanija ciennostiej niezavisimosti i niejtralitieta Biełarusi». V dalniejšiem dvižienije riešiło ispraviť etot «niedostatok» putiem okazanija pomoŝi vojennomu viedomstvu i otpraviło komplekt płakatov «Pałkavodcy i vajenačalniki ziamli biełaruskaj» v adries nieskolkich orhanov vojennoho upravlenija, pričiem biezvoźmiezdno», — skazana ŭ adnym z artykułaŭ.
Pa słovach aŭtara, «srazu žie za biespłatnoj razdačiej płakatov pośledovali piśma v raźličnyje instancii s nastojčivymi prośbami (počti triebovanijami) osuŝiestviť zakupku vyšienazvannych płakatov po cienie 85 tysiač rublej».
Ruch «Za Svabodu» prapanuje «Vajennaj haziecie» i Ministerstvu abarony prademanstravać nibyta isnujučuju kamiercyjnuju prapanovu ad našaj arhanizacyi nie ŭ sudzie, tamu što jaho spraviadlivaść padobna da svabody słova ŭ Biełarusi, a na zhadanych hramadskich słuchańniach, pryśviečanych nacyjanalnaj biaśpieki krainy. Pakolki ŭ kampietentnaści i patryjatyźmie adkaznych za jaje zabieśpiačeńnie asob značnaja častka biełaruskaha hramadstva niebiespadstaŭna sumniajecca.
Dadatak
Zvarot Ruchu «Za Svabodu» da biełaruskaj armii
Kryvavyja padziei va Ukrainie vyklikajuć ŭ biełarusaŭ niepakoj i tryvohu. Nichto nie chacieŭ by, kab na našaj biełaruskaj ziamli išła bratazabojčaja vajna abo niechta imknuŭsia praz svaich dyviersantaŭ padzialić i akupavać našu Biełaruś.
Biełarusy — mirnyja ludzi, ale ŭ krytyčnyja momanty treba być hatovym vyjści ščylnymi radami suprać ahresara, kab baranić mir, terytaryjalnuju cełasnaść i niezaležnaść našaj krainy.
Ahulny i maralna-palityčny stan biełaruskaj armii vyklikaje spraviadlivuju zaniepakojenaść. Siońnia ŭsim vidavočna, što tut niedastatkova raźvity ŭłasna biełaruski patryjatyzm, što mała čaho robicca, kab pašyrać kaštoŭnaści niezaležnaści i niejtralnaści Biełarusi.
My ličym patrebnym nieadkładna pryniać novuju kancepcyju nacyjanalnaj biaśpieki, skiravanuju na ŭličvańnie novych pahrozaŭ i ryzykaŭ dla Biełarusi i jaje dziaržaŭnaści. Pavinna być pryniataja novaja prahrama dziejańniaŭ z pryjarytetam u razumieńni abarony Ajčyny jak abarony mienavita niezaležnaj Biełarusi. Naležyć pryniać prahramu sapraŭdnaj biełarusizacyi našaj armii. Varta pašyrać vykładańnie sapraŭdnaj biełaruskaj historyi ŭ vajskovych vučelniach i častkach, treba vychoŭvać biełaruskich vajskoŭcaŭ na ŭčynkach nie tolki hierojaŭ Vialikaj Ajčynnaj vajny, ale i inšych histaryčnych postaciach kštałtu Usiasłava Połackaha, vialikich kniazioŭ Alhierda i Vitaŭta, Kanstancina Astrožskaha, Tadevuša Kaściuški, Kastusia Kalinoŭskaha. Dziaržaŭnaja biełaruskaja mova pavinna šyrej i rehularna vykarystoŭvacca kamandnym i aficerskim składam padčas uračystych mierapryjemstvaŭ, vučeńniaŭ, štodzionnaj dziejnaści. Sapraŭdnaje biełaruskaje vojska pavinna śpiavać i maršyravać pad biełaruskija pieśni.
My zaklikajem armiejskaje kiraŭnictva skiravać vychavańnie vajennasłužačych u bok biełaruskaha patryjatyzmu i hatovyja prapanavać svaju dapamohu, naprykład, u vyhladzie adpaviednych infarmacyjnych materyjałaŭ i adukacyjnych sustrečaŭ.
My zaklikajem moładź pryzyŭnoha ŭzrostu i dziejnych vajskoŭcaŭ brać prykład ź lepšych synoŭ-abaroncaŭ Baćkaŭščyny, kab voklič «Słužu Respublicy Biełaruś!» byŭ napoŭnieny hłybokim patryjatyčnym sensam».