Rassielhasnahlad pašyryŭ śpis pradpryjemstvaŭ Biełarusi, čyja pradukcyja zabaroniena da ŭvozu ŭ RF
Pad sankcyi trapili jašče 8 pradpryjemstvaŭ.
24.11.2014 / 19:55
Rassielhasnahlad 26 listapada ŭvodzić zabaronu na ŭvoz miasnoj i małočnaj pradukcyi jašče z vaśmi pradpryjemstvaŭ Biełarusi, havorycca ŭ paviedamleńni rasijskaha viedamstva.
«Siońnia namieśnik kiraŭnika Rassielhasnahladu, hałoŭny vieterynarny inśpiektar Rasii Jaŭhien Niepakłonaŭ źviarnuŭsia da hałoŭnaha vieterynarnaha inśpiektara Biełarusi Vasila Pivavara ź listom, u jakim, u pryvatnaści, źviartajecca ŭvaha na toje, što pry łabaratornych daśledavańniach vyjaŭlena nieadpaviednaść tavarnych partyj charčovaj pradukcyi, jakaja pastupiła ŭ Rasiju ź niekatorych pradpryjemstvaŭ Biełarusi, normam i patrabavańniam, praduhledžanym zakanadaŭstvam Rasii i Mytnaha sajuza», — adznačajecca ŭ paviedamleńni.
«U suviazi z surjoznaściu dapuščanych parušeńniaŭ Rassielhasnahlad pryniaŭ rašeńnie ab uviadzieńni z 26 listapada 2014 hoda časovych abmiežavańniaŭ na pastaŭku ŭ Rasiju pradukcyi biełaruskich pradpryjemstvaŭ AAT «Ahrakambinat Skidalski», AAT «Viciebskaja brojlernaja ptuškafabryka», SZAT «Siervaluks Ahra», AAT «Viciebski miasakambinat», AAT «AFVK» Žłobinski miasakambinat», AAT «Kalinkavicki miasakambinat», AAT «Rahačoŭski MKK» i AAT «Ptuškafabryka «Śvitanak»,
— havorycca ŭ paviedamleńni.
Zabarona ŭvodzicca ŭ suviazi ź niedapuščalnym uzroŭniem utrymańnia antybijotykaŭ, a taksama salmanieły i kišačnych pałačak u pradukcyi hetych pradpryjemstvaŭ.
«Rassielhasnahlad źviarnuŭsia z prośbaj da vieterynarnaj słužby Biełarusi ab praviadzieńni rasśledavańnia pa ŭstanaŭleńni pryčyn najaŭnaści zabaronienych i škodnych rečyvaŭ u pradukcyi hetych pradpryjemstvaŭ i raspačać miery pa zabieśpiačeńni pastavak pradukcyi, jakaja adpaviadaje vieterynarna-sanitarnym patrabavańniam i normam Mytnaha sajuza i Rasii», — dapaŭniaje rasijskaje viedamstva.
Raniej Rassielhasnahlad zabaraniŭ uvoz pradukcyi dzieviaci biełaruskich pradpryjemstvaŭ z-za pretenzij da jaje biaśpieki. Abmiežavańni zakranuli takija pradpryjemstvy, jak TAA ZP «Inka-Fud», fiłijał «Siervaluks Ahra» SZAT «Siervaluks», AAT «Smalavickaja brojlernaja ptuškafabryka», AAT «Ahrakambinat Dziaržynski»; AAT «Babulina krynka», ZTAA «Biełaviežskija dalikatesy», AAT «Biarozaŭski miasakansiervavy kambinat», AAT «Brescki miasakansiervavy kambinat», AAT «Homielski miasakambinat».
Akramia taho, pavodle infarmacyi Rassielhasnahladu,
uviedziena zabarona na pradukcyju Słuckaha miasakambinata, u suviazi z vyjaŭleńniem u kaŭbasie hienoma virusa afrykanskaj čumy śviniej.