Kambat «kibarhaŭ» bratajecca z Matarołam – praŭda ci fejk?
13.12.2014 / 21:23
Rasijski kanał Life News raspaŭsiudziŭ videa, na jakim adzin ź viadomych kiraŭnikoŭ bajavikoŭ tak zvanaj «Danieckaj narodnaj respubliki» pa mianušcy Mataroła sustrakajecca z kamandziram bataljona ŭkrainskaj armii, jaki abaraniaje daniecki aeraport.
Taksama ŭ videa pakazvajecca, što bajaviki prapuścili da budynka novaha terminała aeraporta Daniecka try KamAZy ź nibyta ukrainskimi vajskoŭcami. Jak paviedamlajecca ŭ repartažy, hruzaviki ź biełymi ściahami ŭ supravadžeńni pradstaŭnikoŭ ABSIE dastavili błakavanym ukrainskim vajennym pradukty charčavańnia i 51 bajca z Aŭdziejeŭki.
Ludzi, jakija na videa pakazvajucca bajcami ŭkrainskaj armii, vyhladajuć davoli viesieła, ale na pytańnie ab tym, dzie ich kamandzir, hublajucca i nie mohuć dakładna adkazać. Paśla pakazvajecca mirnaja biasieda Mataroły z čałaviekam, jaki nazyvaje siabie kamandziram bataljona ŭkrainskaj armii z pazyŭnym «Kupał».
«Ja vielmi zadavoleny, što my znajšli ahulnuju movu. Jak u nas damova była, tak usio i adbyłosia, bieź źmienaŭ. Vielmi było pryjemna paznajomicca z kamandzirami. Ja vielmi rady, što tak atrymałasia. Ja dumaju, miravuju my jašče budziem śviatkavać. Ja liču, što heta braterskaja vajna. Hałoŭnaje, kab źvierchu razabralisia, a my sałdaty, nam skazali - my robim», - zajaviŭ «Kupał».
«Ja dumaju, što dalej budzie ŭsio narmalna, nastroimsia, na fonie hetaha pieramirja zojmiem ŭsie svaje miescy. Kab nie było lišniaha «badałava». Ni mnie, ni tabie ludziej hublać nie chočacca, - źviarnuŭsia Mataroła da surazmoŭcy. - Ja bolš pieražyvaju za mirnych žycharoŭ, tamu što im prylataje ŭ horad z tvajho boku. A chłopcy, što maje, što tvaje, pryžylisia, buduć badacca da kanca, a voś ŭsio astatniaje… Ja dumaju, što ŭžo para vam na vašym baku navodzić paradak», - skazaŭ kamandzir terarystaŭ Mataroła, jaki pryjechaŭ na sustreču.
U toj ža čas ukrainskija ŚMI paśpiašyli zajavić, što dadzienaje videa źjaŭlajecca fejkam, a kambat z pazyŭnym Kupał sapraŭdy isnuje, ale ich padraździaleńnie vyvieli z aeraporta Daniecka ŭžo 10 dzion tamu.
Da taho ž mikałajeŭski desantnik, viadomy ŭ sacyjalnych sietkach pad nikam «Pazyŭny Maršał» taksama śćviardžaje, što na videa - zusim nie kambat 95 bryhady. Jon śćviardžaje, što čałavieka, jaki na videa, raniej nikoli nie bačyŭ: «Na videa čałaviek, jaki pradstaviŭsia Kupałam, nie jość takim! HETA NIE Kupał! 95 u rajonie aeraporta niama! I tyja, chto słužyć, słužyŭ i pracavaŭ z Kupałam, heta paćvierdzić! Čałavieka na videa ja nie viedaju, i hety vidos realna nie zalik, i dziŭna što tam nie było našych žurnalistaŭ! … Pazyŭny Kupał - heta 95 desantnaja bryhada! A 95 bryhada vykanała zadańnie i znachodzicca ŭ rajonie Kramatorska i Słavianska. A heta pačvara ŭziała jahony pazyŭny! A tam dumajcie sami», - piša desantnik na svajoj staroncy ŭ sacyjalnaj sietcy Facebook.
«Pazyŭny «Kupał» — heta pavažany čałaviek, kambat 95, moj siabar, i my davoli doŭha pracavali plačom da plača! 79 i 95 vykanali zadaču ŭ porcie i ŭ płanie zamieny pajšli pracavać pa inšych zadačach, na dadzienym etapie 95 znachodzicca ŭ adnym rajonie, 79 pracuje pa nastupnaj zadačy ŭ druhim rajonie! Možna skazać, tam dzie zakipaje!
Bolš nie skažu ničoha, bo mianie tam nie było i vačami ja nie bačyŭ! I zdajecca najhranym, my na KamAZach, jašče i ŭ kuzavie nie jeździm na bajavyja, plus u nas adny Urały! A chaciełasia b pahutaryć, viadoma!», — paviedamiŭ Maršał na svajoj staroncy.
Adnak na prastorach sieciva karystalniki tut ža adšukali videarepartaž, padrychtavany ŭkrainskim telekanałam Inter, u jakim pryvodzicca (hladzieć z 0:47) hutarka z čałaviekam, vielmi padobnym da Kupała z repartažu Life News, jaki taksama nazyvajecca Kupałam, tolki nie kamandziram 95 desantnaj bryhady, a namieśnikam kambata 93 miechanizavanaj bryhady. Taksama byŭ znojdzieny repartaž na kanale TSN, u jakim davoli padobny na Kupała z Life News čałaviek pradstaŭleny pad mienavita takim pazyŭnym.
U toj ža momant Raman Donik, vałancior, jaki dapamahaje ŭkrainskim abaroncam danieckaha aeraporta, na svajoj staroncy ŭ Facebook paviedamiŭ nastupnaje: «Sam rolik kamientavać nie źbirajusia. Ale ŭ aeraport ludzi zajšli sa zbrojaj i zavieźli z saboj nieabchodnaje ŭ takoj kolkaści, u jakoj nie ŭdavałasia zrabić heta ŭžo miesiacy dva. Pa mienšaj miery bojeprypasaŭ bolš, čym za apošni miesiac. Mahčyma, prosta syšlisia intaresy i kožny na…vaŭ apanientaŭ, jak moh. Mataroła pakrasavaŭsia, a našy praviali ratacyju ludziej i zavieźli BK (i jašče šmat siaho-taho nieabchodnaha)».
Vałancior nie ličyć patrebnym pakul rabić dalokaidučyja vysnovy: «Słovy słovami, a spravy spravami. Pa fakcie bajavaja zadača vykanana na vydatna i navat bolš. Mahčyma v.a. kambata padstaviŭsia pad udar, kab pamianiać ludziej. Nie viedaju, heta pa-za majoj kampietencyjaj. Pryncypovyja chłopcy, mohuć dakazać svaju pryncypovaść ŭ aeraporcie biez ratacyi i biez bojeprypasaŭ».
Taksama vykazvajucca mierkavańni, što sustreča Kupała i Mataroły była sapraŭdnaj, ale što ludziej z pazyŭnym «Kupał» dva. I mienavita toj samy Kupał z 93 bryhady, jakoha raniej pakazvali ŭkrainskija kanały, nasamreč paciskaŭ ruku bajeviku. Aficyjnych kamientaroŭ ukrainskaha vajennaha kiraŭnictva na hety kont pakul niama.