U homielskich abmiennych punktach deficyt rasijskaj valuty
16.12.2014 / 20:55
U punktach abmienu valuty homielskich bankaŭ 16 śniežnia nazirajecca niedachop rasijskich rubloŭ. U pryvatnaści, ŭviečary ŭ rajonie vakzała i centra horada nie było rasijskaj valuty ŭ abmieńnikach niekatorych bankaŭ, dzie kurs prodažu rasijskaha rubla apuściŭsia da 167—175 biełaruskich rubloŭ za adzin rasijski.
U inšych bankach, dzie zachoŭvaŭsia krychu bolšy kurs, rasijskaja valuta była, ale ŭ abmiežavanaj kolkaści.
Viečaram, kali ŭ adzin z bankaŭ u centry Homiela ź nizkim kursam prodažu rasijskich rubloŭ pastupiła vialikaja suma rasijskaj valuty, tut źjaviłasia doŭhaja čarha.
Popyt na rasijskuju valutu źviazvajuć z tym, što mnohija hamialčanie i žychary pamiežža jeździać u Rasiju za pakupkami, dzie paśla padzieńnia kursu rubla ceny na pradukty i pramysłovyja tavary stali značna nižejšyja za biełaruskija.
Akramia taho, hamialčanie pačali aktyŭna kuplać u bankach i dołary ZŠA paśla taho, jak jaho kurs praciahvaŭ raści.
Taksama vialikija čerhi kala abmiennych punktaŭ byli siońnia ŭ Mahilovie, druhim blizkim da rasijskaj miažy abłasnym centry Biełarusi.