Stvaralnik Facebook budzie čytać pa dźvie knihi na miesiac. Pieršaja – «Kaniec ułady»
Prahramist, pradprymalnik i samy małady miljarder Mark Cukierbierh pryniaŭ čarhovy vyklik na hod: u 2015-ym jon budzie čytać pa knizie na dva tydni.
05.01.2015 / 17:41
Mark Cukierbierh. Fota: technobuffalo.com
Napiaredadni Novaha hodu Cukierbierh spytaŭ parady ŭ karystalnikaŭ: što musić stać jaho metaj u nastupnym hodzie? Z 50 tysiač prapanoŭ jon abraŭ adnu: «čytańnie novaj knihi kožny druhi tydzień – z akcentam na vyvučeńnie roznych kultur, vieravańniaŭ, historyi i technałohij».
Mnostva prapanoŭ nasamreč było źviazana ź litaraturaj: prapanoŭvali čytać knihu, što paraić karystalnik, čytać štomiesiac pra novuju krainu albo prosta pračytać Bibliju.
Abirać knihi Cukierbierh vyrašyŭ samastojna.
Pieršaj knihaj stanie «Kaniec ułady» Mojziesa Naima. «Heta kniha, jakaja daśleduje, jak śviet pierachodzić da nadańnia indyvidu bolšaj ułady, jakuju tradycyjna mieli tolki bujnyja ŭrady, vajskoŭcy i inšyja arhanizacyi, – piša Mark. Trend nadańnia ludziam bolšaj ułady – adzin z tych, u jakija ja vieru, i ad knihi ja čakaju jaho detalovaha daśledavańnia».
Za čytalnickimi pryhodami i nastupnymi knihami miljardera možna sačyć na staroncy A Year In Books – knižnym kłubie na Facebook, zarhanizavanym Cukierbierham.
Papiarednimi «vyklikami samomu sabie» Marka Cukierbierha byli vyvučeńnie kitajskaj movy, štodzionnaje našeńnie halštuku, štodzionnaje napisańnie lista čałavieku, jaki zrabiŭ śviet lepšym, ci pajadańnie tolki miasa tych žyvioł, jakich jon zabiŭ samastojna.