У цэнтры Мінска машына звалілася ў катлаван. Ці быў ён аточаны бетоннымі блокамі, ці пластыкавымі? ФОТА
ДАІ сцвярджае, што машына збіла бетонныя блокі, на здымках з месца відаць толькі пластыкавыя.
26.06.2015 / 15:24
У Мінску аўтамабіль зваліўся ў катлаван, у кіроўцы — удар пляча і чэрапна-мазгавая траўма (ЧМТ) сярэдняй ступені.
Пра гэта БелТА паведаміла кіраўнік прэс-службы ДАІ ГУУС Мінгарвыканкама Таццяна Харлінская.
Жанчына 1977 года нараджэння за рулём аўтамабіля «Фальксваген» рухалася па вуліцы Талстога з боку вуліцы Дружнай. Паварочваючы направа ў бок плошчы Мяснікова на скрыжаванні з вуліцай Маскоўскай, яна збіла бетонныя блокі, якімі быў агароджаны выкапаны катлаван. Машына звалілася ў яму і перакулілася на дах.
«Па шчаслівай выпадковасці непадалёк знаходзіўся экіпаж Дзяржаўтаінспекцыі Маскоўскага раёна. Супрацоўнікі ДАІ разам з дарожнымі рабочымі выцягнулі дзяўчыну з машыны, аказалі ёй першую дапамогу і выклікалі хуткую», — сказала Таццяна Харлінская.
Папярэдне, кіроўца атрымала удар пляча і чэрапна-мазгавую траўму сярэдняй ступені. Пазбегнуць трагедыі ўдалося дзякуючы таму, што дзяўчына была прышпіленая рамянём бяспекі. Яна знаходзіцца ў шокавым стане і дастаўлена ў бальніцу для далейшага удакладнення дыягназу. Тлумачэнняў з нагоды ДТЗ пакуль кіроўца даць не можа.
Цяпер з боку плошчы Мяснікова абцяжараны рух транспартных сродкаў. ДАІ рэкамендуе кіроўцам ўлічваць гэтую інфармацыю пры выбары маршруту руху.