Nabyŭ moc prysud pa spravie ab hibieli dziaŭčynki ŭ kobrynskim akvaparku
15.01.2016 / 17:51
15 studzienia nabyŭ moc prysud pa kryminalnaj spravie ab hibieli siamihadovaj dziaŭčynki ŭ kobrynskim akvaparku, paviedamiŭ staršy prakuror adździeła prakuratury Bresckaj vobłaści Hienadź Bury.
10 listapada 2015 hoda sud Kobrynskaha rajona pryznaŭ 41-hadovuju nastaŭnicu Zavieršskaj bazavaj škoły Drahičynskaha rajona i 39-hadovuju byłuju nastaŭnicu hetaj škoły vinavatymi ŭ nienaležnym vykanańni abaviazkaŭ pa arhanizacyi biaśpieki, žyćcia i zdaroŭja małaletniaha, što paciahnuła pa nieaściarožnaści śmierć małaletniaha, pry adsutnaści prykmiet słužbovaha złačynstva (č. 2 art. 165 KK).
Kožnaja z žančyn prysudžanaja da troch hadoŭ šaści miesiacaŭ abmiežavańnia voli biez nakiravańnia ŭ papraŭčuju ŭstanovu adkrytaha typu sa štrafam u pamiery 100 bazavych vieličyń (18 młn. rubloŭ).
Zhodna z prysudam jany taksama pazbaŭlenyja prava zajmać pasady nastaŭnika i vychavalnika va ŭstanovach adukacyi terminam na piać hadoŭ.
Za baćkami zahinułaha małaletniaha dziciaci pryznana prava na materyjalnuju kampiensacyju maralnaha ŭronu.
Padčas sudovaha pasiadžeńnia ŭstanoŭlena, što 12 červienia abvinavačvanyja supravadžali hrupu z 20 małaletnich dziaciej u ekskursijnaj pajezdcy ź vioski Zavierša ŭ Kobryn, adnym ź miescaŭ naviedvańnia byŭ miascovy akvapark. Supracoŭniki akvaparku praviali adpaviedny instruktaž ź piedahohami. Niahledziačy na toje što nastaŭniki viedali pra abaviazak sačyć za dziećmi, jany hetaha nie rabili.
Siamihadovuju vučanicu Zavieršskaj bazavaj škoły, jakaja nie ŭmieła płavać, dastaŭ z vady naviedvalnik akvaparku. Dziaŭčynka była znojdziena im u hłybokaj častcy basiejna, dzie nie pavinna była znachodzicca, pra što piedahohi byli prainstruktavanyja.
Paciarpiełaja była ŭ stanie kliničnaj śmierci ŭ vyniku ŭtapleńnia. Dziaŭčynku spačatku dastavili ŭ Kobrynskuju centralnuju rajonnuju balnicu, zatym u Bresckuju dziciačuju abłasnuju balnicu, dzie 26 červienia ŭ reanimacyjnym adździaleńni, nie prychodziačy ŭ prytomnaść, jana pamierła.
Na momant vyniasieńnia prysudu 39-hadovaja nastaŭnica sa škoły ŭžo zvolniłasia.
«Niahledziačy na toje što abvinavačvanyja svaju vinu pryznali ŭ poŭnym abjomie, ich abaroncy abskardzili prysud, paličyŭšy, što ŭ dziejańniach žančyn niama składu złačynstva, — adznačyŭ Bury. — 15 studzienia sudovaja kalehija pa kryminalnych spravach Bresckaha abłasnoha suda pakinuła hetyja skarhi biez zadavalnieńnia, pryznaŭšy dovady abaroncaŭ niepierakanaŭčymi i nieabhruntavanymi».
U častcy pakarańnia abvinavačvanym prysud pieršaj instancyi pakinuty bieź źmianieńnia.
Pavodle pratestu prakuratury Kobrynskaha rajona z prysudu vyklučanaje ŭkazańnie ab pryznańni abvinavačvanych nienaležnymi adkazčykami pa hramadzianskim isku ab materyjalnaj kampiensacyi maralnaha ŭronu baćkam zahinułaj dziaŭčynki.