U Mścisłavie pavaliłasia ściana 260-hadovaha kaścioła FOTY
21.12.2017 / 17:05
U Mścisłavie pavaliłasia častka 260-hadovaha kaścioła. Zakliki da dvuch ministraŭ i hramadskaści ab nieabchodnaści ratavać budynak jak maha chutčej nie dapamahli. Historyju pieramovaŭ nieabyjakavaha mścisłaŭca z uładami i sumnyja vyniki čynoŭnickaj biaździejnaści raspaviadaje Tut.by.
Fota wikipedia.org.
Pra toje, što pavaliłasia častka ściany kaścioła ŭ Mścisłavie, raspavioŭ minčuk i ŭradženiec Mścisłava Dzianis Kaściukievič. Jon apublikavaŭ videa, jakoje atrymałasia davoli emacyjnym.
Aktyvist dvojčy źviartaŭsia da ministraŭ kultury — byłoha i ciapierašniaha, Barysa Śviatłova i Juryja Bondara — z prośbaj vyratavać budynak redkaj pryhažości i architektury.
Paśla videazvarotu da Śviatłova Dzianisu pryjšoŭ adkaz za podpisam namieśnika ministra kultury Alaksandra Jacko ab tym, što vyłučyć srodki z respublikanskaha biudžetu na «vyšejadznačanuju historyka-kulturnuju kaštoŭnaść nie ŭjaŭlajecca mahčymym».
U adkazie taksama pryvodziłasia, što ŭ červieni 2017 hoda Ministerstva kultury «prapanavała Mścisłaŭskamu rajvykankamu prapracavać z ułaśnikam historyka-kulturnaj kaštoŭnaści pytańnie i pryniać miery pa pryciahnieńni resursaŭ hramadskich i kamiercyjnych arhanizacyj, sponsaraŭ, inviestaraŭ […] dla stvareńnia ŭmoŭ pa zabieśpiačeńni zachavanaści abjekta spadčyny, u tym liku i pa raspracoŭcy prajektna-kaštarysnaj dakumientacyi».
U mścisłaŭskich uładaŭ hrošaj na rekanstrukcyju kaścioła tym bolš nie znajšłosia. Tolki prajektna-kaštarysnaja dakumientacyja dla rekanstrukcyi kaścioła kaštuje 100 tys. rubloŭ. I suma hetaja prybliznaja.
Tak jezuicki kaścioł vyhladaŭ znutry dva miesiacy tamu, kali pa budynku pajšli novyja raskoliny.
Skrynšot videa Dzianisa Kaściukieviča.
Skrynšot videa Dzianisa Kaściukieviča.
Kałona i arki sa sklapieńniem, jakija jany trymali, abrynulisia z-za taho, što niama dachu. I voś praz dva miesiacy pavaliłasia častka ściany.
— Paśla abvału na miesca vyjazdžali našy śpiecyjalisty pa budaŭnictvie, supracoŭniki MNS, kab pierakanacca ŭ tym, što niama niebiaśpieki ludziam, — raspavioŭ TUT.BY namieśnik staršyni Mścisłaŭskaha rajvykankama Ihar Mielnikaŭ.
Pavodle jaho słoŭ, dostup u budynak zakryty, jość aharodža, kab da jaho nie nabližalisia ludzi. Ciapier čynoŭniki vyrašajuć, što rabić dalej. Ale havorki ab rekanstrukcyi budynka pa-raniejšamu nie idzie, padkreśliŭ Ihar Mielnikaŭ. Dla rajonnaha biudžetu heta prosta niepadjomnaja suma.
Z momantu pieršaha videazvarotu z prośbaj pačać ratavać kaścioł prajšło 5 miesiacaŭ. Padobna na toje, sumny prahnoz Kaściukieviča pra toje, što praz hod ratavać užo nie budzie čaho, pačynaje spraŭdžvacca.