INP: Zajava ab nievinavataści «Buraha» nie maje jurydyčnaj siły

22.03.2019 / 15:41

Instytut nacyjanalnaj pamiaci Polščy źmiaściŭ na svaim sajcie zajavu, u jakoj śćviardžaje, što apublikavanaje raniej u sakaviku paviedamleńnie ŭ spravie śledstva 2005 hoda ab złačynstvach Ramualda Rajsa («Buraha») u adnosinach da biełarusaŭ Padlašša nie maje jurydyčnaj siły, piša Radyjo Svaboda.

11 sakavika na sajcie Instytuta nacyjanalnaj pamiaci (INP) Polščy źjaviłasia paviedamleńnie, jakoje apraŭdvała Ramualda Rajsa, śćviardžajučy, što raniejšyja vysnovy Instytuta ab jaho ŭdziele ŭ hienacydzie etnična biełaruskaha nasielnictva na Padlaššy byli «chibnymi». Pavodle paviedamleńnia, u śviatle ciapierašniaha polskaha zakanadaŭstva za Ramualdam Rajsam niama nijakaj viny.

Ciapierašniaja zajava daje zrazumieć, što raniejšaje paviedamleńnie pra acenku dziejnaści «Buraha» pachodziła ad historykaŭ, praca jakich nie ŭpłyvaje na jurydyčnuju acenku spravaŭ, što rasśledujucca prakurorami Instytuta. U pryvatnaści, apraŭdalnyja acenki historykaŭ nie ŭpłyvajuć na jurydyčnuju kvalifikacyju dziejnaści Ramualda Rajsa, u jakoj śledstva z 2005 hoda znajšło «prykmiety hienacyda» ŭ adnosinach da biełarusaŭ Padlašša.

U vyniku kryvavaha rejdu adździeła Romualda Rajsa ŭ studzieni-lutym 1946 hoda zhareli, častkova abo całkam, vioski Zalešany, Volka, Špaki, Zani, Kancavizna. Zahinuli tady ad kul abo ŭ połymi 79 čałaviek, u tym liku žančyny i dzieci dy 30 biełaruskich furmanaŭ, jakich «Bury» pierachapiŭ na šlachu svajho kryvavaha rejdu.