Жыхар Светлагорска вярнуўся з заробкаў з Расіі і папаўся на гераіне
09.04.2019 / 20:11
У Светлагорску 36-гадовы мужчына вярнуўся з заробкаў з Масквы і тут жа трапіў у рукі наркакантролю. Ён ужываў гераін і перастараўся: з-за перадазіроўкі яму стала кепска, жонка выклікала хуткую.
Пацярпелага даставілі ў бальніцу, дзе і высветлілася, што ён сапраўды ўжываў наркотык. Агляд кватэры толькі пацвердзіў гэты факт: там знайшлі парашкападобнае рэчыва і выкарыстаны шпрыц. Экспертыза паказала, што падазроны парашок не што іншае як гераін вагой 1,88 грам.
Аказалася, што мужчына ўжо меў крымінальны досвед: раней ён быў судзімы за незаконны абарот наркотыкаў. Яго ўзялі пад варту.