«Reał» nazvaŭ canu samamu darahomu hulcu ŭ historyi kłuba

12.04.2019 / 13:33

Fota sa staronki «Reała» ŭ fejsbuku

Madrydski «Reał» hatovy letam rasstacca z valijskim paŭabaroncam Haretam Bejłam i vyznačyŭsia z sumaj kampiensacyi. Pra heta paviedamlaje AS.

Kiraŭnictva madrydskaha kłuba maje namier jak maha bolš vyhadna pradać 29-hadovaha futbalista. Atrymanyja srodki pavinny być nakiravany na ŭzmacnieńnie składu. Patencyjny pakupnik pavinien vykłaści za Bejła 130 miljonaŭ jeŭra.

U kancy sakavika paviedamlałasia, što «Reał» zapłanavaŭ istotnyja traty ŭ letni pieryjad. Francuzski trenier kłuba Ziniedzin Zidan zmoža raźličvać na tranśfierny biudžet u 500 miljonaŭ jeŭra. Siarod patencyjnych navičkoŭ kamandy adrazu dva hulcy zbornaj Francyi — paŭabaronca «Mančestar Junajted» Pol Pohba i forvard Kilijan Mbape z PSŽ.

Kantrakt Bejła z «Reałam» raźličany da leta 2022 hoda. U hetym siezonie jon pravioŭ 25 matčaŭ u čempijanacie Ispanii i adznačyŭsia vaśmiu zabitymi miačami.

Bejł pierajšoŭ u karaleŭski kłub u 2013 hodzie z «Totenchema». Hety tranśfier staŭ samym darahim u historyi «Reała» — hulec abyšoŭsia ŭ 100 miljonaŭ jeŭra.