Jakucki šaman adnaviŭ pachod na Maskvu
08.12.2019 / 18:31
Šaman Alaksandar Habyšaŭ z dvuma prychilnikami adnaviŭ pachod u Maskvu ź Jakucku. Pra heta karespandentu sajtu Sibir.Rieałii raskazali jaho paplečniki, piša Radyjo Svaboda. Pavodle ich, šaman idzie ŭ Kreml z raniejšaj metaj — pravieści «abrad vyhnańnia Pucina».
Prychilnik šamana Jaŭhien Rastokin pa mianušcy Krumkač adznačyŭ, što padpiska Habyšava ab niavyjeździe minuła 14 kastryčnika. Jon dadaŭ, što raniej FSB paćvierdziła, što šaman — «svabodny čałaviek».
Źviazacca z samim šamanam i jaho spadarožnikami karespandentu sajtu nie ŭdałosia.
Alaksandar Habyšaŭ u sakaviku vypraviŭsia ŭ Maskvu dla praviadzieńnia «abradu vyhnańnia Pucina». Jaho zatrymali 19 vieraśnia na miažy Buracii i Irkuckaj vobłaści supracoŭniki FSB. Jon byŭ dastaŭleny ŭ Jakuck, u psychaneŭralahičny dyspanser. U dačynieńni da šamana raspačali kryminalnuju spravu pra zakliki da ekstremizmu i ŭziali ź jaho padpisku ab niavyjeździe. Psycholaha-psychijatryčnaja ekspertyza, praviedzienaja na chadajnictva śledztva, pryznała Habyšava nie pry pamiaci.
3 śniežnia Viarchoŭny sud Jakucii adchiliŭ skarhu advakataŭ šamana Alaksandra Habyšava ab niezakonnym i nieabhruntavanym uzbudžeńni kryminalnaj spravy.
U pravaabarončaj arhanizacyi Amnesty International jakuckaha šamana nazvali viaźniem sumleńnia i patrabavali jaho vyzvaleńnia.