EUobserver: Jeŭrasajuz moža pašyryć sankcyi na biznesoŭcaŭ, źviazanych z Łukašenkam
15.10.2020 / 07:19
Internet-vydańnie EUobserver paviedamiła sa spasyłkaj na nienazvanuju krynicu ŭ kiraŭnictvie Eŭraźviazu, što EZ moža pašyryć sankcyi suprać biełaruskaha kiraŭnictva taksama i na biznesoŭcaŭ, jakija «ŭzbahacili biełaruskaha lidera», piša Radyjo Svaboda.
Jak piša EUobserver, Alaksandar Łukašenka maje siamiejnyja suviazi jak minimum ź dźviuma kiprskimi firmami: da dźviuch tamtejšych kampanijaŭ pa pracy ź nieruchomaściu — Eastleigh Trading i Dana Holdings — maje dačynieńnie niaviestka Łukašenki Liłija, žonka jahonaha starejšaha syna Viktara. EUobserver źviartaje na heta ŭvahu ŭ suviazi z tym, što 12 kastryčnika krainy Eŭraźviazu, uklučna z Kipram, pryniali rašeńnie zamarozić finansavyja aktyvy kiraŭnika Biełarusi, kali jany buduć znojdzienyja.
Liłiju Łukašenku pryznačyŭ dyrektaram Eastleigh Trading Viačasłaŭ Dudkin, były kiraŭnik addziełu pa baraćbie z karupcyjaj MUS Biełarusi, jaki ŭciok z krainy i ŭ 2012 hodzie daŭ interviju žurnalistu Paŭłu Šaramietu dla rasiejskaha vydańnia «Kommiersant'».
Pavodle Dudkina, firma «vykarystoŭvałasia ŭ machlarskich schiemach». A ŭładalnik Eastleigh Trading, biełaruski aliharch Uładzimir Piefcijeŭ byŭ uniesieny ŭ sankcyjny śpis Eŭraźviazu ŭ 2011 hodzie jak «klučavy finansavy sponsar režymu Łukašenki».
Eastleigh Trading praciahvała pracavać i ŭ 2019 hodzie. Zajaŭleny vid dziejnaści — «chołdynhavaja kampanija, pakupka, rekanstrukcyja i pradstaŭleńnie nieruchomaści ŭ Biełarusi». Pavodle aŭdytu, jaje akcyi naležali «vyklučna nierezydentam Kipru».
Liłija Łukašenka ciapier kiruje mastackaj halerejaj u handlovym centry hrupy Dana Holdings u Miensku, jakuju ŭznačalvajuć dva braty-serby: Bojan i Nebajša Karyčy. Jany praciahvajuć białhradzkuju biznes-dynastyju Karyčaŭ, ź jakoj Alaksandar Łukašenka siabruje šmat hadoŭ. Liłija Łukašenka taksama była nazvanaja ŭ finansavaj spravazdačnaści ŭ 2017 hodzie ŭ liku «starejšych słužbovych asobaŭ» daččynaj kampanii Dana Holdings — Dana Astra.
Dana Holdings atrymlivała kantrakty na budaŭnictva vysotnych elitnych žyllovych kompleksaŭ u Miensku. Nebajša Karyč u 2019 byŭ asnoŭnym akcyjaneram kiprskaha addzialeńnia firmy.
Presavy pradstaŭnik Dana Holdings ź pijar-firmy EM, jakaja mieścicca ŭ Londanie, zajaviŭ u kamentary dla EUobserver, što firma nia maje nijakich niezakonnych pryvilejaŭ ad Alaksandra Łukašenki. «Hetaje ćvierdžańnie kateharyčna niepraŭdzivaje. Dana Holdings… zdabyła dazvoły na budaŭnictva praz adkryty, kankurentny praces, u poŭnaj adpaviednaści ź biełaruskim zakanadaŭstvam».
Pradstaŭnik Dana Holdings taksama skazaŭ, što Liłija Łukašenka była prostym dyzajneram i nie viarnułasia na pracu ŭ Dana Astra paśla taho, jak try hady tamu syšła ŭ dekretny adpačynak.
EUobserver adznačaje, što Kipr robić bolš investycyj u Biełaruś, čym lubaja inšaja kraina Eŭraźviazu. Prynamsi 19 hramadzian Biełarusi, u tym liku biznesoŭcy i ich siemji, kupili kiprskija pašparty z 2017 pa 2019 hod, piša vydańnie sa spasyłkaj na infarmacyju Al Jazeera.