Дэпутаты задумалі ўвесці штраф за нясплату транспартнага падатку — 300-400 рублёў
26.11.2020 / 17:05
Як па-новаму збіраць транспартны падатак з кіроўцаў — цяпер галаўны боль дэпутатаў і міністраў. Аляксандр Лукашэнка даручыў ім самім вырашыць пытанне.
Ілюстрацыйны здымак Надзеі Бужан.
На пашыранай нарадзе ў парламенце прыйшлі да такіх высноў:
- Аплачваць дарожны збор можна будзе як за месяц ці некалькі месяцаў, так і за год ці два гады.
- Для фізічных асоб стаўка зменшыцца на 10% адносна цяперашніх тарыфаў, а пры аплаце адразу на год — на 20%.
- Для юрыдычных асоб стаўка зменшыцца на 20%.
- Фіксаваць парушэнні будуць у аўтаматычным рэжыме праз камеры.
- Памер магчымага штрафу апісваецца як «двухразовая гадавая стаўка дарожнага збору». Пасля аплаты такога штрафу кіроўца аўтаматычна атрымае дазвол на рух на год.
- Сістэма запрацуе ў найлепшым выпадку з 1 красавіка 2021 года.
Якім атрымаецца штраф?
Зараз для легкавіка вагой 1,5-2 тоны падатак складае 162 рублі на год, для легкавіка вагой 2-3 тоны — 216 рублёў.
Гэтая стаўка, як абяцаецца, зменшыцца на 10% і складзе 145 рублёў і 195 рублёў адпаведна.
У такім разе штраф будзе складаць 290 рублёў для меншых машын і 390 рублёў для большых.
На гэты момант адказнасці за нясплату транспартнага падатку няма, але ён ідзе ў камплекце з тэхаглядам, а за адсутнасць тэхагляду можна атрымаць папярэджанне ці штраф ад 1 да 3 базавых велічынь. Калі зловяць яшчэ раз — ад 2 да 5 базавых.