Vajskoŭcy Mjanmy ździejśnili vajskovy pieravarot. Aun San Su Čžy aryštavanaja
Uzbrojenyja siły Mjanmy abviaścili ŭ krainie nadzvyčajnaje stanovišča terminam na hod paśla zatrymańnia kiraŭnikoŭ dziaržavy.
01.02.2021 / 07:58
Jak piša Reuters, vajskoŭcy abviaścili, što ŭłada pierachodzić u ruki hałoŭnakamandujučaha ŭzbrojenymi siłami Min Aun Chłaina. Vice-prezident Mjint Švie pryznačany vykonvajučym abaviazki prezidenta, pieradaje partał Irrawaddy.
Pa ich słovach, prezident Vin Mjin i dziaržsavietnik (pasada adpaviadaje kiraŭniku ŭrada), lidar kirujučaj partyi «Nacyjanalnaja liha za demakratyju» (NŁD) Aun San Su Čžy byli zatrymanyja ŭ adkaz na «machinacyi» na listapadaŭskich vybarach.
Ab zatrymańni prezidenta i dziaržsavietnika paviedamiŭ pradstaŭnik NŁD Mia Njunt. Pavodle jaho słoŭ, ranicaj 1 lutaha byli «schoplenyja» i inšyja vysokapastaŭlenyja pradstaŭniki partyi.
Siarod zatrymanych akazalisia členy Centralnaha vykanaŭčaha kamiteta partyi, deputaty i členy ŭrada, pieradaje Assosiated Press. Pavodle źviestak ahienctva, Aun San Su Čžy źmiaścili pad chatni aryšt.
Na vybarach u listapadzie NŁD atrymała pieramohu, atrymaŭšy 396 z 476 miescaŭ. Heta dazvoliła partyi sfarmavać urad jašče na piać hadoŭ. Partyja salidarnaści i raźvićcia Sajuza, jakuju padtrymlivajuć vajskoŭcy, atrymała tolki 33 miescy. Vajskoŭcy paskardzilisia na falsifikacyi i asprečyli vyniki ŭ Viarchoŭnym sudzie, vybarčaja kamisija nie znajšła dokazaŭ machlarstva.
Paśla hetaha armija prystrašyła «pryniać miery». Na hetym fonie paŭstali aściarohi ab vierahodnaści dziaržaŭnaha pieravarotu, adnak Uzbrojenyja siły krainy paabiacali vykonvać Kanstytucyju.
Jak pieradaje Irrawaddy, ciapier u stalicy Mjanmy Najpjida adklučanaja mabilnaja suviaź, dziaržaŭnaje telebačańnie nie pracuje, dastupny tolki telekanał, jaki naležyć vajskoŭcam.
Pres-sakratarka Biełaha doma Džen Psaki zajaviła, što Złučanyja Štaty sočać za padziejami ŭ Mjanmie. «ZŠA vystupajuć suprać lubych sprobaŭ źmianić vynik niadaŭnich vybaraŭ ci pieraškodzić demakratyčnaj pieradačy ŭłady ŭ Mjanmie i prymuć miery suprać vinavatych, kali hetyja kroki nie buduć admienienyja», — padkreśliła jana.
Vajskoŭcy znachodzilisia va ŭładzie ŭ Mjanmie ad 1962 da 2011 hoda, adznačaje RBK.