Z lidaraŭ partyj na «Usiebiełaruski schod» nie zaprasili Paźniaka i Kazłova. Kaho jašče?

Telehram-kanał «Usiebiełaruskaha narodnaha schodu» vykłaŭ śpis lidaraŭ palityčnych partyj, jakich było vyrašana zaprasić na mierapryjemstva ŭ jakaści haściej. U hetym śpisie vosiem proźvišč, a ŭsiaho partyj u Biełarusi 15. Dzie astatnija?

04.02.2021 / 13:51

Lidary praŭładnych kamunistaŭ i ŁDPB buduć udzielničać u schodzie nie ŭ jakaści haściej, a jak delehaty. Heta dźvie partyi, jakija majuć najbolšyja prefierencyi z boku dziaržavy. Toj ža lidar ŁDPB Aleh Hajdukievič na apošnich vybarach byŭ davieranaj asobaj Alaksandra Łukašenki.

Chutčej za ŭsio, u jakaści delehata budzie pradstaŭleny lidar Partyi pracy i spraviadlivaści (PPS) Alaksandr Ściapanaŭ. Nie tak daŭno ŭ partyi adbyłasia skandalnaja źmiena kiraŭnictva.

Pasadu pakinuŭ Vasil Zadniaprany, jaki ŭznačalvaŭ arhanizacyju na praciahu mnohich hadoŭ. Zdajecca, ułady vyrašyli vykinuć z PPS pradstaŭnikoŭ «ruskaha śvietu», zamianiŭšy na čynoŭnikaŭ.

Taksama niama ŭ śpisie haściej pradstaŭnika Ahrarnaj partyi. Heta adno z marhinalnych utvareńniaŭ, pra isnavańnie jakoha ŭspaminajuć tolki padčas elektaralnych kampanij, kab ich pradstaŭniki ŭvajšli ŭ vybarčyja kamisii. Ni ŭ jakim palityčnym žyćci ahraryi, viadoma, nie ŭdzielničajuć. Partyju ŭznačalvaje «sienatar», były vice-prem’ier Michaił Rusy. Mahčyma, jon taksama budzie delehatam schodu.

A voś kaho dakładna nie budzie, dyk heta kiraŭnikoŭ AHP Mikałaja Kazłova, KChP-BNF Zianona Paźniaka i «Zialonych» Dźmitryja Kučuka. Čamuści jany zaprašeńnie nie atrymali ŭvohule.

Z apazicyjnych lidaraŭ paklikali Ihara Barysava (BSDP) i Ryhora Kastusiova (Partyja BNF). Zaprošany taksama Siarhiej Kalakin («Spraviadlivy śviet»).

ZP