Ci biaśpiečna chadzić biez maski paśla vakcynacyi? Nie ŭsio tak prosta
Mnohija spadziajucca, što vakcynacyja stanie viartańniem da narmalnaha žyćcia. Prynamsi bolš nie budzie patreby nasić maski i sačyć za dystancyjaj. Adnak u realnaści ŭsio bolš składana.
06.03.2021 / 16:58
Fota Nadziei Bužan
Niekatoryja ekśpierty pierakananyja, što vakcynavanym ludziam treba davać bolš svabody, kab tym samym zavabić jašče bolš ludziej atrymać vakcynu.
Adnak pa mierkavańni inšych ekśpiertaŭ, nielha admaŭlacca ad mier zaściarohi paśla vakcynacyi, bo nieviadoma, jak vakcyny pakažuć siabie ŭ realnaści.
Bolšaść navukoŭcaŭ zhadžajucca z tym, što pakul nasielnictva nie nablizicca da kalektyŭnaha imunitetu (kali značnaja kolkaść ludziej užo pierachvareli abo atrymali vakcynu, što pieraškadžaje raspaŭsiudu virusa), našeńnie masak, sacyjalnaja dystancyja i zabarona šmatludnych mierapryjemstvaŭ u zakrytych pamiaškańniach musiać zastavacca standartnaj praktykaj u hramadskich miescach, piša The Wall Street Journal.
Voś niekatoryja rekamiendacyi ad navukoŭcaŭ dla tych, chto ŭžo atrymaŭ vakcynu.
Ci možna vakcynavanym sustrakacca ź inšymi ludźmi, jakija taksama atrymali pryščepku?
Z navukovaha punktu hledžańnia, kali abodva atrymali vakcynu, to ich sustrečy całkam biaśpiečnyja. Tamu ekśpierty śćviardžajuć, što paśla poŭnaj vakcynacyi ludzi mohuć sustrakacca adno z adnym biez masak i zachoŭvańnia dystancyi navat u zakrytych pamiaškańniach.
Adnak čym bolšaja hrupa ludziej, tym bolš pavialičvajecca ryzyka, što niekatoryja jašče nie atrymali pryščepku. Tamu ŭ šmatludnych miescach usio roŭna nieabchodna zachoŭvać miery zaściarohi. Tym nie mienš, ekśpierty adznačajuć, što ŭ hramadskich miescach pryščeplenyja ludzi mohuć adčuvać siabie bolš kamfortna.
Što rabić, kali darosłyja atrymali pryščepku, a dzieci nie?
Na siońnia nie isnuje nivodnaj vakcyny, jakaja b była dazvolena dzieciam da 16 hadoŭ. Heta adna z tych prablem, ź jakoj sutyknucca siemji ŭ najbližejšy čas.
Isnuje značnaja roźnica pamiž dziećmi i padletkami z punktu hledžańnia pieradačy virusa. Padletki zaražajucca i chvarejuć tak ža, jak i maładyja darosłyja, a dzieci małoha ŭzrostu, u svaju čarhu, pieranosiać infiekcyju bieśsimptomna ŭ bolšaści vypadkaŭ.
Tamu daktary śćviardžajuć, što ŭ takim vypadku maje miesca indyvidualny padychod da kožnaj siamji. Ludzi z pasłablenym imunitetam i ich siemji pavinny być bolš aściarožnyja, bo vakcyny dla ich mohuć mieć mienšuju efiektyŭnaść.
Ci mohuć vakcynavanyja ludzi raspaŭsiudžvać virus siarod nievakcynavanych?
Niadaŭnija daśledavańni pakazali, što vakcynacyja źnižaje vierahodnaść bieśsimptomnaj infiekcyi na 80% u paraŭnańni ź niepryščeplenymi ludźmi. Adnak heta tolki papiarednija źviestki, na jakija ekśpierty nie rajać abapiracca.
Da taho ž, novyja štamy karanavirusa vyklikajuć dadatkovyja pytańni nakont efiektyŭnaści vakcyn.
Mienavita tamu navukoŭcy rekamiendujuć zachoŭvać miery zaściarohi navat paśla vakcynacyi.
Što nakont padarožžaŭ?
Jak tolki vam zrobiać pryščepku, padarožža dla vas budzie bolš biaśpiečnym. Adnak treba być pilnym z tymi, chto jašče nie atrymaŭ vakcynu, a taksama varta paźbiahać tych krain i rajonaŭ, dzie zachoŭvajecca vysokaja kolkaść vypadkaŭ zaražeńnia.