Супраць Навальнага завялі яшчэ адну крымінальную справу
Следчы камітэт Расіі распачаў новую крымінальную справу ў дачыненні да Аляксея Навальнага — па факце стварэння некамерцыйнай арганізацыі, якая пасягае на асобу і правы грамадзян.
29.04.2021 / 13:47
ТАСС
Пра гэта ТАСС паведаміла крыніца ў праваахоўных органах.
Па гэтым артыкуле палітыку пагражае максімальнае пакаранне да трох гадоў пазбаўлення волі.
«Разам з ім падазраванымі праходзяць Леанід Волкаў і Іван Жданаў», — дадаў суразмоўца агенцтва.
Інфармацыя аб новай крымінальнай справе ў дачыненні да Навальнага, Волкава і Жданава ўтрымліваецца ў матэрыялах іскавай заявы пракуратуры аб прызнанні Фонду барацьбы з карупцыяй экстрэмісцкай арганізацыяй.
Аляксей Навальны знаходзіцца за кратамі з 17 студзеня. Ён быў затрыманы адразу пасля вяртання ў Маскву з Нямеччыны, дзе праходзіў лячэнне пасля атручвання ядам групы «Навічок». Навальнаму замянілі ўмоўны тэрмін на рэальны (прыкладна 3,5 года) па справе «Іў Рашэ». З 31 сакавіка па 24 красавіка ён трымаў галадоўку, патрабуючы дапусціць да яго цывільнага доктара.