Namieśnik dyrektara Instytuta ekanomiki NAN staŭ adnym z kiraŭnikoŭ BT. Jak takoje mahčyma?
Kadravy dzień u Alaksandra Łukašenki nie vydaŭ vialikich niečakanaściaŭ. Pryznačanyja try novyja načalniki UUS abłaściej, a taksama pieršy namieśnik i prosta namieśnik staršyni Biełteleradyjokampanii.
30.04.2021 / 13:56
Pieršym namieśnikam staŭ 37-hadovy Siarhiej Husačenka. Jaho źviazvaje daŭniaje siabroŭstva z kiraŭnikom BT Ivanam Ejsmantam. Husačenka rodam z Minska, vučyŭsia na žurfaku BDU. U hety čas jon supracoŭničaŭ z roznymi vydańniami, u tym liku z «Našaj Nivaj». Adnak u jakaści miesca pracy było abranaje dziaržaŭnaje telebačańnie.
Ciapier Husačenka z’iaŭlajecca aŭtaram prapahandysckich, vykryvalnickich repartažaŭ pra apazicyju, a taksama dziejnaść niezaležnych SMI.
Žanaty z viadučaj BT Volhaj Makiej, na ich viasiełle Łukašenka padaryŭ miašok bulby.
Jašče adnym namieśnikam Ivana Ejsmanta staŭ 41-hadovy Dźmitryj Prymšyc. Niezvyčajnaść situacyi ŭ tym, što hety čałaviek pryjšoŭ na BT nie z žurnalisckich ci ideałahičnych kołaŭ, a ź Instytutu ekanomiki NAN. Da niadaŭniaha času jon tam z’iaŭlaŭsia namieśnikam dyrektara pa navukovaj i inavacyjnaj rabocie. Jak takoje mahčyma?
Dźmitryj Prymšyc (pieršy źleva) na sustrečy z delehacyjaj z Kambodžy. Fota BiełTA.
Sprava ŭ tym, što siarod namieśnikaŭ kiraŭnika Biełteleradyjokampanii jość čałaviek, jaki adkazvaje za finansy. Raniej takim była Volha Kananiuk, ciapier budzie Prymšyc.
Jon rodam z Hrodna. Skončyŭ ekanamičny fakultet miascovaha ŭniviersiteta. Potym pracavaŭ tam stažoram, vykładčykam, namieśnikam dekana. U 2015 hodzie Prymšyca zabrali ŭ Minsk, u Akademiju navuk. Kandydat ekanamičnych navuk, dacent.
Admietna, što Prymšyc doŭha pracavaŭ razam z ciapierašnim pamočnikam Łukašenki ŭ pytańniach ekanomiki Valeryjem Bielskim, jaki i ŭznačalvaŭ Instytut ekanomiki. Jany razam publikavali navukovyja pracy, naprykład, «Bazavyja pryčyny handlova-ekanamičnaha supraćstajańnia ZŠA i KNR». Uvohule ŭ Prymšyca dastatkova šmat publikacyj mienavita pra Kitaj.
Sioleta navaśpiečany namieśnik kiraŭnika BT havaryŭ, što zakliki da źniaćcia ŭkładaŭ i kupli valuty — heta «instrumient hibrydnaj vajny suprać biełaruskaj dziaržavy». Taksama jon prasiŭ pravaachoŭnikaŭ razabracca z tymi ludźmi i arhanizacyjami, jakija robiać padobnyja zakliki.