Mužčyna trapiŭ u avaryju, vyklikaŭ DPS, a jaho zatrymali za nalepku z Pahoniaj na telefonie. Vynik — 10 sutak

42-hadovy Vital Rubiec pracuje elektramiechanikam. 16 maja jon trapiŭ u avaryju i vyklikaŭ supracoŭnikaŭ DPS. Pry afarmleńni dakumientaŭ paśla avaryi mužčyna dastaŭ telefon, na jakim była nalepka z Pahoniaj. Mužčynu zatrymali i advieźli ŭ Pieršamajski RUUS, kab skłaści pratakoł.

19.05.2021 / 16:11

Pavodle pratakoła pa art. 24.23 KaAP, Vitala abvinavačvajuć u «pikietavańni šlacham raźmiaščeńnia nalepki z Pahoniaj na čachle telefona», paviedamlaje spring96.org.

Spravu Vitala Rubca 18 maja razhledzieła sudździa Pieršamajskaha rajona Śviatłana Čarapovič.

Čachoł z nalepkaj, pa słovach Vitala, jamu daŭ brat za paru dzion da zatrymańnia. Nalepcy Vital nie nadaŭ značeńnia, bo jana dla jaho ničoha nie značyć.

Supracoŭniki DPS paprasili mužčynu źviazacca ź jaho pracadaŭcam, tamu Vital dastaŭ telefon, kab patelefanavać. U hety čas supracoŭniki DPS zaŭvažyli nalepku i, zhodna ź ich rapartam, paprasili jaje źniać, ale Rubiec admoviŭsia.

Vital rastłumačyŭ, što ŭ momant prośby byŭ u stanie afiektu paśla DTZ, tamu prosta moh nie źviarnuć na heta ŭvahu.

U vyniku Vital Rubiec byŭ aryštavany sudździoj Čarapovič na 10 sutak.