«Nie dapuścić napružanaści ŭ kalektyvach»: dla biudžetnikaŭ uvodziać źmieny pa zarobkach
Ad 1 lipienia dla biudžetnikaŭ uviaduć čarhovyja źmieny pa zarobkach. Jany datyčacca siarod inšaha premij i nadbavak rabotnikam. Ciapier čynoŭniki, prafsajuzy tłumačać biudžetnym arhanizacyjam, jak budzie pracavać novaja schiema apłaty pracy, kab «nie dapuścić i papiaredzić sacyjalnuju napružanaść u kalektyvie» i vyklučyć vypadki źnižeńnia zarobkaŭ, piša Tut.by.
23.05.2021 / 11:48
Papiarednija istotnyja źmieny ŭ zarobkach biudžetnikaŭ, jakija ŭviali z 2020 hoda, supravadžalisia šmatlikimi pamyłkami ŭ naličeńni i vypłacie zarobkaŭ biudžetnikam, skarhami biudžetnikaŭ, kalektyŭnymi zvarotami.
Lipieńskija źmieny pa zarobkach biudžetnikaŭ praduhledžanyja ukazam № 482 ad 22 śniežnia 2020 hoda. Paśla hetaha profilnyja viedamstvy pryniali pastanovy, kab uvieści zarpłatnyja novaŭviadzieńni, u tym liku ŭ achovie zdaroŭja, adukacyi, kultury.
Kali koratka pra źmieny, jakija ŭviaduć z 1 lipienia:
- pavialičać pamier srodkaŭ, jakija iduć na premiravańnie rabotnikaŭ biudžetnych arhanizacyj — z 5% da 20% (ale ŭ miežach praduhledžanych vydzielenych hrošaj na apłatu pracy);
- na premiravańnie zmohuć nakiroŭvać niavykarystanyja srodki, praduhledžanyja na apłatu pracy, u tym liku niavykarystanyja ŭ studzieni-červieni hetaha hoda;
- u miedykaŭ admieniać nadbaŭku za vysokija dasiahnieńni ŭ pracy, a ŭ rabotnikaŭ kultury admieniać nadbaŭku «za vysokija prafiesijnyja i tvorčyja dasiahnieńni ŭ pracy»;
- u rabotnikaŭ kultury źjavicca «nadbaŭka za vysokija prafiesijnyja i tvorčyja dasiahnieńni ŭ pracy, składanaść i napružanaść pracy» — u pamiery ad 5 da 25% sumy akładaŭ rabotnikaŭ;
- dla miedykaŭ uviaduć novuju kampiensavalnuju vypłatu — bazavaja dapłata;
- u achovie zdaroŭja nadbaŭka za składanaść i napružanaść pracy budzie nie abmiežavanaja maksimalnym pamieram (ciapier — da 200% akładu);
- u achovie zdaroŭja nadbaŭku za zabieśpiačeńnie pakazčykaŭ dziejnaści biudžetnaj arhanizacyi ŭstalujuć kiraŭnikam biudžetnych arhanizacyj u pamiery da 200% akładu ŭklučna (ciapier — da 100% akładu ŭklučna).
«Pakolki z 1 lipienia 2021 hoda na premiravańnie buduć nakiroŭvacca nie tolki srodki ŭ pamiery 20% sum akładaŭ rabotnikaŭ, ale i niavykarystanyja srodki, praduhledžanyja na apłatu pracy, to ŭstanaŭleńnie inšych stymulujučych (akramia premii)i kampiensavalnych vypłat u kankretnym pamiery dazvolić zachavać uzrovień apłaty pracy rabotnikaŭ, ustalavany da 1 lipienia 2021 hoda», - tłumačyli raniej u Minpracy.
Čynoŭniki nazyvajuć źmieny udaskanaleńniem sistemy apłaty pracy.
Zaraz na miescach pravodziać narady i dajuć tłumačeńni, u tym liku kab pa «niedapuščeńni i papiaredžańni sacyjalnaj napružanaści ŭ kalektyvach».
U niekatorych biudžetnych arhanizacyjach u prajekcie kalektyŭnaj damovy, jakuju źbirajucca ŭvieści z 1 lipienia paśla ŭviadzieńnia zarpłatnych navin, prapisvajuć, što najmalnik i prafsajuz abaviazvajucca «prymać vyčarpalnyja miery pa sacyjalnaj abaronienaści rabotnikaŭ, a taksama niedapuščeńni i papiaredžańni sacyjalnaj napružanaści ŭ kalektyvie». A taksama pravodzić tłumačalnuju pracu z kožnym rabotnikam pa pytańniach novaj sistemy apłaty pracy.
Čamu čynoŭniki miarkujuć, što praz zarpłatnyja novaŭviadzieńni moža ŭźniknuć sacyjalnaja napružanaść, nie tłumačycca. Nie vyklučana, što z-za papiaredniaha vopytu pa istotnych źmienach pa zarobkach u 2020 hodzie, jakija supravadžalisia šmatlikimi pamyłkami ŭ naličeńni i vypłacie zarobkaŭ biudžetnikam, skarhami biudžetnikaŭ, kalektyŭnymi zvarotami.
Raniej u Minfinie zajaŭlali, što naśpieła nieabchodnaść pierahladu štataŭ biudžetnych arhanizacyj.