Sud nie zadavoliŭ skarhu Sofji Sapieha na zatrymańnie
Sudovaje pasiadžeńnie prajšło 14 červienia ŭ sudzie Partyzanskaha rajona Minska ŭ zakrytym režymie.
14.06.2021 / 11:14
Pra toje, što Sofja Sapieha padała skarhu, stała viadoma ad jaje advakata.
Taksama 11 červienia advakat va ŭpraŭleńni Śledčaha kamiteta pa Minsku aznajomiŭsia z dakumientami, jakija tyčacca zatrymańnia Sofji, a taksama źviestkami ab raspačynańni ŭ dačynieńni da Sofji 23 maja 2021 hoda jašče adnoj kryminalnaj spravy.
Sofja Sapieha — siabroŭka Ramana Pratasieviča. Jana była zatrymanaja razam ź im paśla prymusovaj pasadki ŭ Minsku samalota Ryanair, što lacieŭ z Afinaŭ u Vilniu. Sapieha — hramadzianka Rasii. Ciapier jana znachodzicca ŭ SIZA KDB.