Novy dakład Pientahona nie vyklučaje isnavańnia NŁA. Za 17 hadoŭ amierykanskaja raźviedka zafiksavała 144 nieapaznanyja abjekty
Ofis dyrektara Nacyjanalnaj raźviedki ZŠA apublikavaŭ spravazdaču ab nieapaznanych latajučych abjektach, zafiksavanych z 2004 da 2021 hoda.
28.06.2021 / 14:56
U dakładzie adznačajecca, što za ŭsie hady było atrymana 144 paviedamleńni ab NŁA, dakładnaje pachodžańnie jakich raźviedcy nie ŭdałosia vyśvietlić, piša The Reuters.
Aŭtary dakłada pryvodziać niekalki mahčymych tłumačeńniaŭ. U niekatorych vypadkach za NŁA mahli być pryniatyja pryrodnyja atmasfiernyja źjavy, ptuški, pavietranyja šary abo drony.
U dakład taksama ŭklučanyja niekatoryja vypadki NŁA, jaki raniej Pientahon pakazaŭ na videa. Na ŭschodnim i zachodnim uźbiarežžach ZŠA byli zaŭvažanyja niezvyčajnyja latalnyja abjekty, chutkaść jakich pieravyšała chutkaść viadomych avijacyjnych technałohij. Bolš za toje, jany nie mieli bačnych srodkaŭ pierasoŭvańnia abo pavierchniaŭ kiravańnia palotam.
Aŭtary dakłada nie vyklučajuć, što NŁA mahli mieć inšaziemnaje pachodžańnie.
NŁA taksama mohuć być uzorami peŭnaj techniki, jakuju vypraboŭvali amierykanskija kampanii ŭ miežach zasakrečanych prahram. Bolš za toje, takija abjekty mahli być technikaj, stvoranaj Rasijaj, Kitajem ci inšaj krainaj, a taksama niedziaržaŭnymi arhanizacyjami.
Adzinaha tłumačeńnia dla NŁA niama, ale adznačajecca, što takija abjekty stvarajuć pahrozu jak avijazłučeńniu, tak i nacyjanalnaj biaśpiecy ZŠA, bo nieapaznanyja abjekty mohuć być srodkami špijanažu abo demanstracyjaj novych technałohij inšymi dziaržavami.
Heta nie pieršy aficyjny dakład ZŠA ab NŁA. Vajenna-pavietranyja siły ZŠA ŭ 1969 hodzie skłali śpis z 12 618 nazirańniaŭ, 701 ź jakich byli abjekty, što zastalisia aficyjna nieapaznanymi.