Doktarku aštrafavali za hierb Litvy na aŭto. Žančyna nie kleiła nalepku na mašynu — tak pryjechała z Litvy
12 kastryčnika sud Kastryčnickaha rajona Viciebsku razhledzieŭ administratyŭnuju spravu pavodle art. 24.23 KaAP, zaviedzienuju na doktara-pulmanołaha Marynu Burblis. Jaje pryznali vinavataj u parušeńni zakanadaŭstva ab masavych mierapryjemstvach za nalepku hierba Litvy na bahažniku aŭto. Na sudzie stała viadoma, što kryška bahažniku była «niarodnaja», jaje mianiali ŭ Litoŭskaj Respublicy. Na joj zastałasia nalepka z hierbam hetaj krainy. Advakat prasiŭ nie pazbaŭlać miedyka svabody, bo jana pracuje ŭ čyrvonaj zonie, paviedamlajuć pravaabaroncy.
13.11.2021 / 20:08
Spravu raźbiraŭ suddzia Uładzimir Carykaŭ.
Pavodle rapartu supracoŭnika Kastryčnickaha RAUS Viciebska, infarmacyja pra aŭtamabil «Opiel Viektra» z Pahoniaj na bahažniku pastupiła 14 kastryčnika. Amal praz tydzień, 20 kastryčnika, byŭ praviedzieny ahlad aŭtamabila i składzieny pratakoł ahladu.
Na pieršym sudovym pasiadžeńni, jakoje adbyłosia 2 listapada, muž Maryny Burblis patłumačyŭ, što kryška na bahažniku była zamienienaja. Jaje pryvieźli z Litvy, mužčyna pakazaŭ na sudzie pierapisku z pradaŭcom.
Na sudzie ŭ jakaści śviedki vystupiŭ niepasredny načalnik žančyny — vykanaŭca abaviazkaŭ zahadčyka pieršaha terapieŭtyčnaha addzialeńnia Viciebskaj haradskoj centralnaj palikliniki Vadzim Parfienćieŭ.
Zdymak maje ilustracyjny charaktar: Fota: limpalipdukai.lt
Jon acharaktaryzavaŭ svaju padnačalenuju stanoŭča, paviedamiŭ, što Maryna Burblis ad samaha pačatku pandemii ŭ składzie bryhady vyjazdžała da chvorych na kavid. Ciapier taksama pracuje ŭ čyrvonaj zonie.
Suddziu Carykava cikaviła, ci abmiarkoŭvała na pracy doktarka palityčnyja temy i ci nie stajaŭ u jaje kabiniecie bieł-čyrvona-bieły ściažok. Zahadčyk addzialeńnia adkazaŭ, što ničoha nie bačyŭ, nijakich palityčnych tem u addzialeńni nie abmiarkoŭvajuć.
Advakat Maryny zajaviŭ, što litoŭski hierb žančyna nie stała zdymać z bahažnika, kab nie paškodzić pakryćcio aŭtamabila, a taksama što simvał Pahonia nie pryznany ekstremisckim abo zabaronienym.
Zaznačyŭ, što padčas pandemii hałava jahonaj padabaronnaj była zaniataja zusim inšymi pytańniami, źviazanymi z pracaj.
Advakat prasiŭ, kab u vypadku, kali Marynu Burblis pryznajuć vinavataj, jaje nie adpraŭlali za kraty, bo joj treba dapamahać chvorym na COVID-19.
Suddzia Uładzimir Carykaŭ pryznaŭ lekarku vinavataj i pryniaŭ rašeńnie aštrafavać žančynu na 50 bazavych vieličyń (1450 rubloŭ).
Prysud moža być abskardžany ŭ abłasnym sudzie.