«Прапаноўваюць стаць… дружыннікам». На сталічным хлебазаводзе прыдумалі арыгінальны спосаб пазбегнуць палітычнага звальнення

ФОТАФАКТ

Як стала вядома «Нашай Ніве», хваля звальненняў закранула і «Хлебазавод №2» у Мінску. Па інфармацыі чытачоў, туды прыйшоў спіс на звальненне з парай дзясяткаў імёнаў тых, хто перад выбарамі падпісаўся за альтэрнатыўных кандыдатаў. Праўда, ёсць адно «але». Нібыта ёсць шанец, пазбегнуць звальнення , калі напішаш заяву на ўступленне ў «добраахвотную дружыну».

29.12.2021 / 16:56

«Альбо заява на звальненне, альбо ўступленне ў дружыннікі. Дырэктар просіць усіх абраць другое, бо кадраў бракуе», — расказаў «Нашай Ніве» адзін з супрацоўнікаў.

Так выглядае кампрамісная заява на далучэнне да атрадаў дружыннікаў. Адным з абавязкаў будзе прысячэнне правапарушэнняў і паведамленне пра іх у праваахоўныя органы.

Па словах суразмоўцы, пасля падпісання заявы людзей павінны прымацаваць да апорных пунктаў і ў вольны час яны павінны патруляваць горад. 

«Сутнасць, відаць, у тым, каб паказаць, што людзі пакаяліся і перайшлі на бок уладаў. А яшчэ, магчыма, гэтыя спісы дружыннікаў будуць апублікаваныя, і гэта таксама будзе выдатнай карцінкай для цяперашняй улады. Людзі не жадаюць далучацца да дружын, але многія збіраюцца ўступіць, бо не хочуць пазбавіцца працы, трэба карміць сем’і», — каментуюць суразмоўцы.

Раней падобныя прапановы паступалі супрацоўнікам Беларускай чыгункі. Калі вам вядома пра такія ж кейсы на вашых прадпрыемствах, паведамце пра гэта ў тэлеграм-бот «Нашай Нівы». Гэта ананімна і бяспечна.

Стаў вядомы лайфхак па ўладкаванні на работу, калі вы «палітычны»

Скандальна вядомы функцыянер БРСМ Цюхай пайшоў у «дружыннікі». Расказвае, як першыя поспехі

Nashaniva.com