У Брэсце дырэктар фірмы выдаваў падробленыя камандзіровачныя дакументы для выезду за мяжу
Аператыўнікі высветлілі, што з кастрычніка 2021 года 38-гадовы мужчына за ўзнагароджанне «адпраўляў у камандзіроўку» ахвотных. Падробленыя дакументы былі неабходныя для спрашчэння перасячэння мяжы ў сувязі з існуючымі «антыкавіднымі» абмежаваннямі.
12.01.2022 / 11:28
Паслугамі прадпрымальніка скарысталіся восем чалавек.
Уладальнікі такіх камандзіровачных дакументаў вызваляліся ад неабходнасці захоўвання рэжыму самаізаляцыі, а таксама маглі перасякаць мяжу без ПЛР-тэста.
Камандзіровачныя пасведчанні выдаваліся ў тым ліку і асобам, якія не мелі працоўных адносін з фірмай.
За свае паслугі мужчына атрымліваў з кожнага кліента каля дзесяці даляраў, паведамляе прэс-служба МУС.
Больш за год беларусы не могуць свабодна выязджаць з краіны наземным транспартам. З 19 снежня 2020 года ўведзеныя абмежаванні на выезд. Грамадзянам патрэбныя важныя прычыны для замежных паездак: камандзіроўка, вучоба, лячэнне і г.д.