Źliŭ z SK: Matolka, Puciła i Viačorka prachodziać pa 10 artykułach Kryminalnaha kodeksa
Daradca Śviatłany Cichanoŭskaj Francišak Viačorka apublikavaŭ u siabie ŭ Fejsbuku dakumient, jaki nibyta pachodzić sa Śledčaha kamiteta. Miarkujučy pa apublikavanym skanie, jon razam z Ramanam Pratasievičam, Antonam Matolkam i Ściapanam Puciłam abvinavačvajucca albo padazrajucca pa dziesiaci artykułach Kryminalnaha kodeksa Biełarusi.
16.01.2022 / 17:36
Fotakałaž zerkalo.io
Hety dakumient — list namieśnika staršyni Śledčaha kamiteta Anatola Vasiljeva načalniku ŭpraŭleńnia SK pa Minskaj vobłaści Andreju Lisu z prośbaj kamandziravać śledčaha Žodzinskaha haradskoha addzieła SK u Hałoŭnaje ŭpraŭleńnie pa rasśledavańni złačynstvaŭ u sfiery arhanizavanaj złačynnaści i karupcyi centralnaha aparata Śledčaha kamiteta.
Dakumient datavany 28 śniežnia 2021 hoda. Viačorka, Pratasievič, Matolka, Puciła i «inšyja asoby» pavodle jaho abvinavačvajucca i padazrajucca pa nastupnych artykułach:
- 357 (zmova ci inšyja dziejańni, učynienyja z metaj zachopu dziaržaŭnaj ułady — da 12 hadoŭ pazbaŭleńnia voli);
- 342 (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich — da 4 hadoŭ pazbaŭleńnia voli);
- č. 1 i 3 art. 293 (masavyja biesparadki — da 15 hadoŭ pazbaŭleńnia voli);
- 130 (raspalvańnie rasavaj, nacyjanalnaj, relihijnaj albo inšaj sacyjalnaj varožaści abo varožaści — da 12 hadoŭ pazbaŭleńnia voli);
- 361 (zakliki da mieraŭ abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś — da 12 hadoŭ pazbaŭleńnia voli);
- 188 (paklop — da 3 hadoŭ pazbaŭleńnia voli);
- 368 (abraza prezidenta Respubliki Biełaruś — da 4 hadoŭ pazbaŭleńnia voli);
- 3611 (stvareńnie ekstremisckaha farmavańnia albo ŭdzieł u im — da 7 hadoŭ pazbaŭleńnia voli);
- 3612 (finansavańnie ekstremisckaj dziejnaści — da 8 hadoŭ pazbaŭleńnia voli);
- 356 (zdrada dziaržavie — da 15 hadoŭ pazbaŭleńnia voli).
Troje ź pieraličanych, uklučajučy i samoha Franciška Viačorku, pa stanie na siońniašni dzień žyvuć za miažoj. Ściapan Puciła, stvaralnik pryznanaha biełaruskimi ŭładami ekstremisckim papularnaha telehram-kanała Nexta, i Anton Matolka, papularny błohier, ŭniesienyja ŭ «pieralik arhanizacyj i fizičnych asob, jakija majuć dačynieńnie da terarystyčnaj dziejnaści» KDB. Raniej było viadoma, što pieršaha abvinavačvajuć pa kryminalnaj spravie pa art. 293 (masavyja biesparadki) KK Biełarusi, a druhoha — pa kryminalnaj spravie pa č. 1 art. 14 i č. 3 art. 289 (zamach na akt teraryzmu).
Adziny, chto znachodzicca ŭ Biełarusi — Raman Pratasievič, były redaktar telehram-kanała Nexta. Jon byŭ zatrymany 23 maja 2021 hoda paśla vymušanaj pasadki ŭ Minsku samalota irłandskaj avijakampanii Ryanair, jaki lacieŭ z Afinaŭ u Vilniu, ciapier znachodzicca pad chatnim aryštam. Pratasievič abvinavačvajecca pa kryminalnaj spravie pa art. 293 (masavyja biesparadki) KK Biełarusi. Zatrymanuju razam z Ramanam jaho dziaŭčynu, rasijanku Safiju Sapiehu buduć sudzić pa siami artykułach KK. Jaje sprava ŭžo pieradadziena ŭ Hrodzienski abłasny sud.