Mytnia nie puściła ŭ Biełaruś užo 29 hruzavikoŭ z padsankcyjnym tavaram
Biełaruskaja mytnia ŭžo spyniła 29 sprobaŭ uvozu sankcyjnych charčovych tavaraŭ, pastaŭki jakich u krainu zabaranili pastanovaj urada. Pra heta skazaŭ staršynia Dziaržaŭnaha mytnaha kamiteta Uładzimir Arłoŭski.
26.01.2022 / 17:23
«Z pačatku hoda my nie prapuścili na terytoryju krainy 29 hruzavikoŭ, jakija vieźli zabaronieny tavar pad vyhladam inšaha tavaru. Skłali adpaviednyja pratakoły. My nie tolki pracujem pa źniešniaj miažy ŭ punktach propusku, ale i mabilnymi hrupami kantralujem biełaruska-rasijski ŭčastak miažy, kab adtul nie zavozili tavary, jakija ŭ nas zabaronienyja», — skazaŭ Arłoŭski.
Biełaruski ŭrad z 1 studzienia zabaraniŭ uvozić dziasiatki vidaŭ charčovych tavaraŭ u Biełaruś ź Jeŭrasajuza, ZŠA, Šviejcaryi, Vialikabrytanii i inšych krain, jakija ŭvodzili sankcyi suprać biełaruskaha režymu. Pad zabaronaj apynulisia miasa, miasnyja pradukty, małako i małočnyja pradukty, sadavina i harodnina, sol, kandytarskija vyraby.