Siońnia viečaram praz Litvu projduć apošnija ciahniki z hruzam «Biełaruśkałija»
U noč z paniadziełka na aŭtorak pavinien spynicca tranzit pradukcyi «Biełaruśkałija» praz Litvu — ad biełaruskaj miažy da Kłajpiedskaha porta.
31.01.2022 / 16:04
Fota: Scanpix
Heta aznačaje spynieńnie tranzitu uhnajeńniaŭ, abjom jakoha niaŭchilna ros bolš dziesiać hadoŭ. U apošnija hady jon składaŭ kala 11 młn ton i prynosiŭ dziasiatki miljonaŭ jeŭra dachodu «Litoŭskaj čyhuncy, terminału nasypnych hruzaŭ (Biriu kroviniu terminalas), jaki častkova kantralujecca «Biełaruśkałijem», i Kłajpiedskim dziaržaŭnym marskim portam, paviedamlaje Delfi.lt.
Apošni sastaŭ z kalijnymi ŭhnajeńniami, pavodle damovy, padpisanaj ŁČ i «Biełaruśkałijem» u 2018 hodzie, pavinien zajechać u Litvu ŭ paniadziełak kala 19-20 hadzinaŭ, kab dabracca da Kłajpiedskaha porta da poŭnačy, paviedamiŭ BNS pradstaŭnik ŁČ Mantas Dubaŭskas.
Zvyčajna praz Litvu štodnia prachodzić kala 6-7 sastavaŭ, pa 60 vahonaŭ u kožnym, abo kala 30 tys. ton uhnajeńniaŭ. Paśla taho, jak ŁČ u siaredzinie studzienia paviedamiła «Biełaruśkałiju» ab skasavańni kantraktu, z 1 lutaha kampanija atrymała nie mienš piaci zajavak na pieravozku uhnajeńniaŭ ad roznych pretendentaŭ, ale ni adna ź ich nie była uchvalenaja.
«Na luty nie zacvierdžanaja nivodnaja zajaŭka», — skazaŭ Dubaŭskas BNS u niadzielu ŭviečary.
Ministr transpartu Litvy Marus Skuodzis taksama kaža, što ŭ jaho niama infarmacyi ab adpraŭlenych hruzach uhnajeńniaŭ paśla 1 lutaha.
«Na hety momant mnie ničoha nie viadoma ab dalejšym ich śledavańni», — skazaŭ BNS Skuodzis u niadzielu. Adnak niekatoryja krynicy BNS nie vyklučajuć, što situacyja moža źmianicca, kali, naprykład, sud prypynić dziejańnie pastanovy ŭrada.